Жиззах вилоятининг Пахтакор ва Шароф Рашидов туманларида патронлар, ўқотар қурол ва ўқ-дориларни ноқонуний сақлаб келган шахслар ушланди. Бу ҳақда Ички ишлар вазирлиги хабар берди.
Қайд этилишича, Пахтакор тумани Ички ишлар бўлими тезкор қидирув хизмат ходимларининг тезкор тадбирида туманнинг “Ғалаба” маҳалласида яшовчи, муқаддам Жиноят кодексининг 169-моддаси (ўғрилик) 1-қисми билан судланган 2007 йилда туғилган фуқаро текширилган. Мазкур жараёнда унинг ўзи билан олиб юрган эркаклар сумкаси ичида турли калибрдаги патронлар мавжудлиги аниқланган. Сумкадан тўрт дона патрон топилган. Аниқланишича, уларнинг бир қисми заводда ишлаб чиқарилган бўлиб, барча ашёвий далиллар белгиланган тартибда расмийлаштириб олинган.
Шунингдек, тадбир давомида Жиззах шаҳрининг “Хайробод” маҳалласида яшовчи 1983 йилда туғилган фуқаронинг ҳам ноқонуний қурол-аслаҳа сақлаётгани фош этилган. Аниқланишича, у “Шариллоқ” маҳалласи ҳудудида жойлашган фермер хўжалигига тегишли дала шийпонида бир дона ўқотар қурол, бир дона жанговар патрон, порох, дроб ҳамда бўш гильзаларни сақлаб келган. Топилган ашёлар ҳам холислар иштирокида тегишли тартибда ҳужжатлаштирилиб, процессуал тартибда олинган.
Мазкур ҳолат юзасидан Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) билан жиноят иши қўзғатилган.
