Япониялик олимлар ўсмирлар ва ёши катталарда кўпроқ учрайдиган, оддий таҳлиллар орқали аниқланиши қийин бўлган янги хавфли қон саратонининг кичик турини аниқлади. Бу ҳақда тадқиқот раҳбари Япония Миллий онкология марказининг саратон ривожланишини ўрганиш бўлими бошлиғи Кеничи Йошида маълум қилди.
Гап Т-ҳужайрали ўткир лимфобластик лейкознинг янги кичик тури ҳақида бормоқда. Бу етилмаган иммун ҳужайралардан ривожланадиган хавфли қон касаллиги ҳисобланади. Мингдан ортиқ ҳолат ўрганилган тадқиқот давомида ушбу янги кичик тур 7 ёшдан 35 ёшгача бўлган 14 беморда аниқланган. Ўртача ёш тахминан 17 ёшни ташкил этгани касалликнинг кўпроқ ўсмирлар ва ёши катталарда учрашини кўрсатади.
Йошиданинг айтишича, бу касаллик тури даволаш натижалари ёмон бўлгани сабабли, жуда юқори хавф гуруҳига киритилган.
“Ушбу кичик турга эга беморлар прогнози ноқулай бўлгани сабабли кўплаб қайталаниш ва ўлим ҳолатлари кузатилган”, деган у.
Таҳлиллар шуни кўрсатдики, бу кичик тур стандарт текширувларда кўпинча аниқланмай қолиши мумкин. Сабаби у кам учрайдиган хромосома ўзгариши билан боғлиқ бўлиб, бунда генлар фаолиятини бошқарувчи ДНК қисми бошқа жойга кўчади ва бошқа генларни фаоллаштиради. Натижада ўсмалар тез ва агрессив ҳолда ўсади.
“Бу кичик турни аниқлаш мос даволаш усулларини танлаш имконини беради. Жумладан, гематопоэтик илдиз ҳужайралар трансплантацияси орқали соғайиш эҳтимолини ошириш мумкин”, деган Йошида.
Унинг сўзларига кўра, бундай касаллик турини аниқ аниқлашда замонавий генетик таҳлил усуллари муҳим аҳамиятга эга.
“Янги технологиялар, масалан, тўлиқ геном секвенциялаш асосидаги тадқиқотлар жуда муҳим бўлади”, дея таъкидлаган у.
Шу билан бирга, нима сабабдан бу кичик тур айнан ўсмирлар ва ёши катталарда кўпроқ учраши ҳозирча номаълум.
“Сабаби ҳозирча аниқ эмас, бироқ биз буни ушбу кичик турнинг ўзига хос хусусияти деб ҳисоблаймиз”, деган тадқиқотчи.
Шунингдек, Йошида олинган натижалар янги даволаш усулларини ишлаб чиқишга ёрдам беришига умид билдирган.
