Сальвадордаги Мара Сальватруча (MS-13) жиноий гуруҳи таркибидаги 248 нафар иштирокчига нисбатан узоқ муддатли қамоқ жазолари тайинланди. Хусусан, улардан бири 1335 йилга қамалган. Бу ҳақда Сальвадор Бош прокуратурасига таяниб, “The Guardian” хабар берди.
Нашрнинг ёзишича, яна 10 нафар жиноятчи 463 йилдан 958 йилгача озодликдан маҳрум этилган. Ҳукмлар, жумладан, 43 та қотиллик ва 42 та одамнинг бедарак йўқолиши билан боғлиқ жиноятлар бўйича чиқарилган. Сальвадор Бош прокуратураси ҳукмлар қачон чиқарилгани ва суд жараёнлари оммавий тарзда ўтказилган-йўқлигини аниқлаштирмаган.
Расмий маълумотга кўра, Мара Сальватруча (MS-13) ва Баррио 18 гуруҳлари уч йил давомида тахминан 200 минг кишининг ўлимига сабаб бўлган. Бир вақтлар бу гуруҳлар Сальвадор ҳудудининг қарийб 80 фоизини назорат қилган, мамлакат эса дунёдаги энг юқори қотиллик даражасига эга давлатлардан бири бўлган. Жиноятчилар тадбиркорлардан уларга зарар етказмаслик эвазига пул талаб қилган, айрим қурбонлар эса доимий таҳдидлар сабаб бизнесини бутунлай тўхтатишга мажбур бўлган.
“The Guardian”нинг эслатишича, 2022 йил март ойидан буён Сальвадор Президенти Найиб Букеле фавқулодда ҳолат шароитида жиноятчи тўдаларни қатъий бостириш сиёсатини бошлаган, бу эса суд ордерисиз ҳибсга олиш имконини берган. Шу вақт ичида 90 минг киши ҳибсга олинган, улардан 8 минг нафари айбсиз деб топилиб, озод этилган. Ушбу кампания мамлакатда қотилликлар сонининг тарихий минимумга тушишига олиб келган, бироқ инсон ҳуқуқлари ташкилотлари ҳуқуқ-тартибот идораларини ваколатни суиистеъмол қилишда айбламоқда.
