Татаристонда дронлар ҳужуми оқибатида ҳалок бўлган 8 нафар фуқаро жасади Ўзбекистонга олиб келинди. Бу ҳақда 12 август куни ТИВ матбуот хизмати хабар берди.
10 август куни Татаристондаги Нижнекамск шаҳрида жойлашган қатор объектларга дронлар орқали ҳужум содир бўлганди. Ҳодиса оқибатида Нижнекамск шаҳридаги қурилиш корхонасида ишлаган 8 нафар Ўзбекистон фуқароси ҳалок бўлган, бир қатор фуқаролар эса турли даражада тан жароҳатлари билан шифохоналарга жойлаштирилган.
Ўзбекистон президенти топшириғига мувофиқ ташкил этилган ҳукумат комиссияси доирасида Ташқи ишлар вазирлиги, Фавқулодда вазиятлар вазирлиги, Ички ишлар вазирлиги, Соғлиқни сақлаш вазирлиги, Миграция агентлиги ва бошқа масъул идоралар томонидан ҳалок бўлган фуқароларнинг жасадларини ватанга олиб келиш, жабрланганларга зарур ёрдам кўрсатиш ҳамда уларнинг оила аъзоларини қўллаб-қувватлаш бўйича тегишли чоралар кўрилди.
Жумладан, Ўзбекистон фуқароларига зарур ёрдам кўрсатиш мақсадида Ўзбекистоннинг Россиядаги элчиси Ботиржон Асадов ҳамда Ўзбекистоннинг Қозон шаҳридаги бош консули Нодиржон Қосимов зудлик билан воқеа жойига бориб, маҳаллий масъул идоралар билан учрашувлар ўтказди.
Натижада, 12 август куни махсус авиарейс орқали ҳалок бўлган фуқароларнинг жасадлари Ўзбекистонга олиб келиниши таъминланди.
Ташқи ишлар вазирлиги хабарида таъкидланишича, мазкур ҳолат билан боғлиқ барча масалалар, жумладан, жабрланган фуқароларга зарур ёрдам кўрсатиш ишлари Россия томони билан ҳамкорликда назоратга олинган.
Қурбонлар орасида Тожикистон фуқароси ҳам бор. Татаристон раҳбари Рустам Минниханов Ўзбекистон ва Тожикистон президентларига дрон ҳужумлари оқибатида ҳалок бўлган фуқаролар учун ҳамдардлик билдирди
