Ўзбекистонда чиқинди хизматидан қарздор 205 мингга яқин абонентнинг электр тўловига вақтинча чеклов ўрнатилди. Бу ҳақда 11 декабрь куни Чиқиндиларни бошқариш ва циркуляр иқтисодиётни ривожлантириш агентлиги хабар қилди.
Қайд этилишича, мамлакат бўйича чиқинди хизматидан қарздорлигини қопламаган 204 895 та абонентнинг электр энергияси учун тўлов қилиш имкониятига вақтинча чеклов жорий этилган. Бунгача республикада чиқинди хизматларидан юзага келган умумий 20,1 миллиард сўм дебитор қарздорлик учун жами 231 014 та абонент “Ҳудудий электр тармоқлари” АЖнинг 2100 қисқа рақамидан SMS хабарнома орқали огоҳлантирилган.
Шундан сўнг абонентларга мавжуд қарздорлигини бартараф этиш учун 6 декабрда 5 (беш) кун муддат берилган ва ушбу даврда 9,4 миллиард сўмлик тўловлар амалга оширилган.
Айни пайтда чиқинди хизматларидан республика кесимида жами 18,2 миллиард сўм дебитор қарздорлик мавжуд. Истеъмолчилар қарздорликни бартараф этиши биланоқ электр тўловига қўйилган чеклов дарҳол ечилади.
Чиқинди хизматларидан шаклланган қарздорликлар учун электр тўловига вақтинча чеклов Тошкент шаҳрида 2025-йилнинг 5 ноябридан бошлаб қўлланмоқда. Мазкур тартиб жорий йилнинг декабрь ойидан бошлаб республиканинг қолган ҳудудларида ҳам жорий этилди.
Санитар тозалаш корхоналари чиқинди тўловларини ҳисоблашда аниқлик ва ҳаққонийлик учун жавобгар ҳисобланади.
Ўзбекистонда 2026-йилнинг 1 январидан чиқинди хизматлари учун тўловларни уйма-уй юриб ундириш тўхтатилади. Чиқинди хизматлари учун тўловлар жисмоний ва юридик шахслар томонидан фақат онлайн тарзда барча электрон тўлов тизимлари орқали амалга оширилади. Санитар тозалаш соҳасида истеъмолчилардан фақатгина кўрсатилган хизматлар учун тўлов ҳисобланади.
