Бирлашган Араб Амирликларининг Дубай шаҳрида эркаклар ўртасида ўтказилаётган бокс бўйича Жаҳон чемпионати давом этмоқда. Халқаро бокс ассоциацияси (IBA) томонидан ташкил этилган мусобақанинг ярим финал босқичида Ўзбекистон терма жамоасининг 9 нафар боксчи рингга чиқди. Уларнинг 6 нафари ғалаба қозониб, финал йўлланмасига эга чиққан бўлса, 3 нафар боксчи мағлубиятга учради ва бронза медалига эга чиқди.
Дастлаб, -75 кг вазн тоифасида қозоғистонлик Сабиржан Аккаликовга қарши рингга чиқиши керак бўлган Фазлиддин Эркинбоев жароҳат туфайли жангда қатнашмайдиган бўлди. Шу билан Эркинбоэв ярим финалда ўз юришини якунлади ва бронза медалига эга чиқди. Куннинг иккинчи жангида ҳам ўзбекистонлик боксчи мағлубиятга учратди. -54 кг вазнда Асилбек Жалилов россиялик Виачеслав Рогозинга 0:5 ҳисобида мағлуб бўлиб, Ўзбекистон делегацияси ҳисобига иккинчи бронза медалини ёздириб қўйди. Шунингдек, -57 кг вазн тоифасида Хўжаназар Нортожиев ҳам мағлуб бўлди. У Ярим финалда тожикистонлик Хусравхон Раҳимовга 0:5 ҳисобида имкониятни бой берди.
-60 кг вазнда рингга чиққан Абдумалик Ҳалоков ярим финалда арманистонлик Артур Базеянини 5:0 ҳисобида енгиб, дастлабки финалчига айланди. -67 кг вазн тоифасида Асадхўжа Мўйдинхўжаев молдовалик Александру Парасчивни 5:0 ҳисобида мағлуб этиб, финал йўлланмасига эга чиқди. Ҳасанбой Дўстматов ҳам финалда иштирок этади. -51 кг вазн тоифасида ринга чиқадиган ўзбекистонлик боксчи ярим финалда арманистонлик Рудолф Гарбояни 5:0 ҳисобида мағлубиятга учратди. -80 кг вазнда Жавоҳир Умматалиев кубалик икки карра Олимпиада чемпиони Арлен Лопесни 5:0 ҳисобида енгиб, 4-финалчига айланди.
Шунингдек, куннинг иккинчи қисмида -92 кг вазнда рингга чиқадиган Тўрабек Ҳабибуллаев Озарбайжон шарафини ҳимоя қилаётган Алфонс Домингесни 5:0 ҳисобида мағлуб этди. Куннинг сўнгги жангида Арман Маханов ҳам финалга чиқди. У +92 кг вазн тоифасида арманистонлик Давит Чалоянни 5:2 ҳисобида енгди.
Шу тариқа, Ўзбекистон терма жамоасининг 3 нафар боксчиси бронза медалига эга чиқди. Яна 6 нафар аъзоси финал йўлланмасини қўлга киритди. Ҳал қилувчи баҳслар 13 декабрь санасида бўлиб ўтади.
