Хитой олимлари сунъий йўлдош интернетини дронлар ёрдамида ўчириб қўйиш технологиясини муваффақиятли синовдан ўтказди. Бу ҳақда South China Morning Post хабар берди.
Синов жараёнлари Чжецзян университети ва Пекин технология институти мутахассислари томонидан олиб борилган. Улар Хитой армиясининг Тайван ўлчамидаги ҳудудда Starlink алоқасини ўчириши керак бўлган вазиятни моделлаштиришган. Ҳисоб-китоблар шуни кўрсатдики, бу техник жиҳатдан амалга ошиши мумкин. Аммо бу мақсадга эришишда радиоэлектрон кураш воситалари билан жиҳозланган 1000 га яқин дрон керак бўлади.
Маълум қилинишича, Хитой Россиянинг Украинага бостириб киришидан сўнг Starlink тизимининг самарадорлигини кўриб, уни ишдан чиқариш йўлларини излай бошлаган.
“Бу билан Пекин Тайван масаласида урушни қандай олиб боришни ўйлаган. Чунки эҳтимолий душман алоқа учун ерусти станцияларига эмас, балки 8 мингта сунъий йўлдошдан иборат Starlink тармоғидан фойдаланиши мумкин. Бу тизим частоталар ва сигналлар йўналишини ўзгартира олади”, дейилади хабарда.
Олимлар хулосасига кўра, Тайванда Starlinkни тўлиқ блоклаш учун 935 дан 2 000 тагача синхрон ишлайдиган шовқин бостирувчи қурилмалар билан жиҳозланган дронлар керак бўлади. Уларнинг аниқ сони ускунанинг сифати ва мураккаблигига боғлиқ бўлади.
Шунингдек, РЕК воситаларини фақат дронларда эмас, балки аэростатлар ёки самолётларга жойлаштириш ҳам таклиф қилинмоқда. Хитой мутахассислари бу биргаликда душман ҳудуди устида электромагнит “қалқон” ҳосил қилишини айтди.
Starlink сайёрамизнинг исталган нуқтасида интернетга кенг полосали уланишни таъминлайдиган тармоқдир. Бунинг учун орбитага 550 километр баландликда 8 800 дан ортиқ сунъий йўлдошлар жойлаштирилган. Starlink терминаллари Россиядан ҳимояланаётган Украинанинг дронлари, ҳаво ҳужумидан мудофаа мобил гуруҳлари, радиоэлектрон алоқа воситалари ва видеокузатув тизимлари ишини таъминлашда муҳим рол ўйнайди.
