Жисмоний шахсларнинг мол-мулк ва ер солиғи бўйича қарздорлиги 1 миллион сўмдан ошганда уни электр энергиясининг биллинг тизими орқали ундириш 2026 йил 16 апрелдан бошлаб Наманган вилоятида жорий этилади. Бу ҳақда Солиқ қўмитаси хабар берди.
Ушбу тизим вилоятда эксперимент тариқасида амалиётга татбиқ этилади. Шу муносабат билан “Солиқ биллинг” автоматлаштирилган ахборот тизими ишлаб чиқилди.
Тизим қандай ишлайди?
Агар жисмоний шахснинг солиқ қарздорлиги 1 миллион сўмдан ошса, аввало фуқаро бир неча босқичда огоҳлантирилади. Дастлаб фуқарога солиқ ҳисоблангани ҳақида хабарнома, шундан сўнг SMS орқали эслатма, агар фуқарода “Солиқ” мобил иловаси мавжуд бўлса, хабарнома юборилади.
Бундан ташқари, my.gov.uz орқали ҳам фуқаронинг шахсий кабинетига хабар юборилиши мумкин. Шундан кейин солиқ органи томонидан электр тўловига чеклов киритилиши мумкинлиги тўғрисида SMS хабарнома юборилади. Ушбу SMSдаги ҳавола орқали солиқ қарздорлиги қачон шакллангани ва огоҳлантириш қайси босқичда эканини фуқаро кузатиб бориши мумкин.
Барча огоҳлантиришларга қарамай, солиқ қарздорлиги бартараф этилмаса, фуқаронинг электрга тўлов қилиш имкониятига вақтинчалик чеклов киритилади. Қарздорлик бартараф этилса, чеклов онлайн тартибда дарҳол бекор қилинади.
