Исроил тунги ҳаво ҳужумларида Эрон хавфсизлик кенгаши котиби Али Ларижоний ҳалок бўлганини маълум қилди. Бу ҳақда Исроил мудофаа вазири Исроил Кацга таяниб, The Times of Israel хабар берди.
Исроил армияси ҳужумда Али Ларижонийни нишонга олганини маълум қилди. Шу билан бирга, яна бир ҳужумда Эроннинг Басиж ҳарбийлаштирилган кучлари қўмондони Ғуломризо Сулаймоний ҳалок бўлган.
“Ларижоний ва Басиж қўмондони тунда йўқ қилинди ҳамда қирғин дастури раҳбари Хоманаий ва ‘ёвузлик ўқи’нинг барча йўқ қилинган аъзолари қаторида жаҳаннам қаъридан жой олди”, деди Кац 17 март куни эрталаб ўтказилган йиғилишда.
Ҳозирда Эрон Али Ларижонийнинг ҳалок бўлгани ҳақидаги хабарларга муносабат билдиргани ёки уни рад этгани йўқ. Ларижоний ядровий масалалар бўйича собиқ музокарачи ва Хоманаийнинг яқин иттифоқчиси ҳисобланган. У охирги марта 13 март куни Теҳрондаги Қудс куни намойишларида кўриниш берган эди. Ўша куни тунда АҚШ Эроннинг юқори мартабали ҳарбий ва разведка амалдорлари, жумладан, Ларижоний ҳақидаги маълумот учун 10 миллион долларгача мукофот ваъда қилганди.
