Саудия Арабистони валиаҳд шаҳзодаси Муҳаммад ибн Салмон “Барселона” футбол клубини сотиб олишга қизиқиш билдирмоқда. Бу ҳақда El Chiringuito журналисти Франсуа Галярдо X (собиқ Twitter) саҳифасида маълум қилган.
Манбага кўра, Муҳаммад ибн Салмон яқин вақт ичида клубни сотиб олиш бўйича расмий таклиф билан чиқишни режалаштирмоқда. Эҳтимолий келишув қиймати 10 миллиард еврога баҳоланмоқда. Бироқ Галярдонинг таъкидлашича, битимга клуб аъзолари, яъни президент сайловларида ва бошқарув масалаларида овоз бериш ҳуқуқига эга бўлган шахслар қаршилик кўрсатиши мумкин.
Goal нашри хабарига кўра, “Барселона”ни сотиб олиш ҳамда молиялаштирилишини Саудия Арабистонининг Давлат инвестиция жамғармаси ўз зиммасига олиши мумкин. Айни пайтда каталониялик клубнинг умумий қарздорлиги 2,5 миллиард еврони ташкил этади. Муҳаммад ибн Салмон Саудия Арабистони Давлат инвестиция жамғармасига раҳбарлик қилади. Мазкур жамғарма 2021-йилда Англиянинг “Ньюкасл” клубини сотиб олган, клубнинг номинал эгаси сифатида эса валиаҳд шаҳзода кўрсатилган.
Маълумот учун, “Барселона” клуби 1899-йилда ташкил этилган бўлиб, Испаниядаги энг совриндор жамоа ҳисобланади. Forbes маълумотларига кўра, “Барселона” дунёдаги энг қиммат беш футбол клубидан бири бўлиб, унинг қиймати 5,6 миллиард доллар атрофида баҳоланади.
