TikTok платформасидаги энг йирик аккаунт эгаси, италиялик блогер Хаби Лейм ўзига тегишли Step Distinctive Limited компаниясидаги улушининг бир қисмини АҚШда рўйхатдан ўтган Rich Sparkle Holdings компаниясига сотди.
Манбаларга кўра, келгуси уч йилни қамраб оладиган битим қиймати тахминан 900 миллион долларни ташкил этади. Шартнома доирасида Rich Sparkle Holdings Хаби Лейм брендига доир эксклюзив тижорат ҳуқуқларини қўлга киритади. Жумладан, компания блогер номидан брендлар билан ҳамкорлик қилиш, реклама шартномаларини тузиш, лицензиялаш жараёнларини юритиш ҳамда электрон тижорат лойиҳаларини амалга ошириш ваколатига эга бўлади.
Rich Sparkle Holdings томонидан эълон қилинган прогнозларга кўра, ушбу тижорат фаолияти келгусида йилига 4 миллиард долларгача даромад келтириши мумкин. Шу билан бирга, битим Хаби Леймнинг мустақиллигини тўлиқ чекламайди: у компанияда назорат қилувчи акциядор мақомини сақлаб қолади. Rich Sparkle эса блогернинг тижорий фаолиятини халқаро миқёсда тизимли равишда ривожлантириш билан шуғулланади.
Компания вакилларининг таъкидлашича, ушбу келишув анъанавий реклама бозоридан анча кенгроқ мақсадларни кўзлайди.
“Бу оддий инвестиция ёки улуш сотиб олиш эмас. Бу контент, шахсий бренд ва электрон тижоратнинг глобал моделида янги босқични бошлаб берадиган стратегик ҳамкорликдир”, дейилади Rich Sparkle расмий баёнотида.
Битимнинг энг эътиборга молик жиҳатларидан бири — Хаби Леймнинг сунъий интеллект асосидаги рақамли эгизагини яратиш бўйича розилиги бўлди. Ушбу СИ модел блогернинг ташқи қиёфаси, мимикаси ва ўзига хос ифодаларини такрорлай олади. Режаларга кўра, рақамли эгизак кўп тилли контент ишлаб чиқариш, жонли онлайн трансляцияларни олиб бориш ҳамда аудитория билан 24/7 форматда мулоқот қилиш имконини беради.
Мутахассислар фикрича, бу ёндашув ушбу брендни географик ва вақт чекловларидан холи тарзда кенгайтириш имконини беради. Шу билан бирга, рақамли эгизак орқали реклама ва савдо жараёнларини автоматлаштириш, контент ҳажмини бир неча баробарга ошириш кўзда тутилмоқда.
Хаби Лейм бугунги кунда TikTok’даги энг машҳур блогер ҳисобланади. Унинг аккаунтига 160 миллиондан ортиқ фойдаланувчи обуна бўлган. Instagram’да эса унинг қарийб 78 миллион обуначиси мавжуд.
2022 йилда Хаби Лейм Hugo Boss мода уйи билан ҳамкорлик қилган бўлса, 2025 йилда у ЮНИСЕФнинг яхши эзгу элчиси этиб тайинланган. Блогер мураккаб ва ортиқча кўрсатмали лайфхакларни жим турган ҳолатда, кинояли ишоралар орқали масхара қиладиган қисқа видеолари билан танилган. Айнан шу содда, тилга боғлиқ бўлмаган формат унинг контенти бутун дунё бўйлаб тушунарли ва оммабоп бўлишига сабаб бўлган.
