Наманган вилоятининг Учқўрғон туманида уйида қиморхона ташкил қилган 53 ёшли шахс қўлга олинди. Бу ҳақда вилоят Ички ишлар бошқармаси хабар берди.
Қайд этилишича, Учқўрғон туман Ички ишлар бўлими ходимлари томонидан олиб борилган тезкор профилактик тадбирлар давомида туманнинг “Қўрғонча” маҳалласида яшовчи 1973 йилда туғилган фуқаро ўзи яшаб келган хонадонда моддий манфаатдорлик эвазига 15 нафар таниши билан бирга ноқонуний биллиард ўйинларини ташкил этган. Тунги вақтда эса таваккалчиликка асосланган лотерея шаклидаги қимор ўйинлари учун шароит яратиб берган.
Билдирилишича, мазкур ҳолат юзасидан Учқўрғон туман ички ишлар бўлими ҳузуридаги тергов бўлинмаси томонидан Жиноят кодексининг 278-моддаси (Қимор ва таваккалчиликка асосланган бошқа ўйинларни ташкил этиш ҳамда ўтказиш) 1-қисми билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
