Шимолий Кореяда Пхеньян шаҳридан ташқари бошқа провинцияларда ҳам фуқароларга хусусий автомобилларга эгалик қилишга рухсат берилди. Бу ҳақда мамлакат ичидаги манбага таяниб Daily NK хабар берди.
Маълум қилинишича, тегишли фармон 8 январь куни имзоланган. Унга кўра, 24 ёшдан ошган ва ҳайдовчилик гувоҳномасига эга бўлган ҳар қандай фуқаро автомобилни ўз номига расмийлаштириши мумкин. Аввалроқ бундай ҳуқуқ фақат амалдорлар ва имтиёзли қатлам вакилларигагина берилган эди.
Янги фармон 2024 йилда автомобилларга эгалик қилиш тўғрисидаги қонун қайта кўриб чиқилганидан кейинги ислоҳотларнинг давоми ҳисобланади. Расмийлар бу ўзгаришларни мамлакат етакчиси Ким Чен Иннинг “халққа ғамхўрлиги” сифатида талқин қилиб, ислоҳот эскирган транспорт тизимини модернизация қилишга қаратилганини таъкидламоқда.
Бироқ маҳаллий манбага кўра, асл мақсад хорижий валютани жалб қилишдан иборат. Чунки КХДР автомобилларни мустақил ишлаб чиқармайди. БМТ Хавфсизлик кенгаши санкцияларига қарамай, машиналар Хитой билан чегарадош ҳудудлар орқали мамлакатга олиб кирилмоқда.
Эндиликда полиция хусусий автомобилларни ҳар ой ёки ҳар чоракда мажбурий текширувдан ўтказади. Бу ҳукуматга машиналарнинг техник ҳолатини баҳолаш билан бирга, уларнинг эгалари томонидан йўл ҳаракати қоидаларига риоя этилишини ҳам назорат қилиш имконини беради. Нисбатан бадавлат айрим фуқаролар ушбу янгиликни ижобий қабул қилган, чунки энди улар автомобилга қонуний эгалик қилиши мумкин.
Шу билан бирга, аҳолининг бир қисми бу ўзгаришлардан хавотир билдирмоқда.
“Одамлар машинани рўйхатдан ўтказгач, ҳукумат уларнинг автомобиль сотиб олишга маблағни қаердан олганига шубҳа билан қарашидан ва эгаларнинг доимий назорат остига тушишидан хавотирда”, дейди маҳаллий манба.
Айни пайтда расмийлар узоқ йиллар давомида оддий фуқаролар учун асосий транспорт воситаси бўлиб келган мототцикллардан фойдаланиш қоидаларини ҳам кучайтирмоқда. Мамлакат йўллари авария хавфи юқори бўлган икки ғилдиракли транспорт воситалари билан тўлиб кетган.
Шу сабабли давлат мототциклларни рўйхатдан ўтказиш нархини кескин ошириш ёки уларнинг эксплуатацияси устидан назоратни кучайтиришни режалаштирган. Мототциклдан тирикчилик манбаи сифатида фойдаланаётган фуқаролар эса бундан норози. Уларнинг автомобиль сотиб олишга имконияти йўқ, мототциклларга қўйиладиган чекловлар эса уларни даромад манбаидан маҳрум қилиши мумкин.
