Москва жанубида РФ ҚК Бош штаби тезкор тайёргарлик бошқармаси бошлиғи, генерал-лейтенант Фанил Сарваров ўз автомобилида портлатиб юборилди. Бу ҳақда РФ Тергов қўмитаси маълум қилди.
Ҳолат юзасидан қотиллик содир этиш ва портловчи моддаларнинг ноқонуний айланиши моддалари билан жиноят иши қўзғатилган.
Портлаш 22 декабрь куни эрталаб Ясеневая кўчасидаги 12-уй яқинидаги тўхташ жойида содир бўлган. Тергов қўмитаси маълумотларига кўра, портловчи қурилма автомобиль тагига ўрнатилган. «Коммерсантъ» нашрининг ёзишича, портлаш учун магнитли минадан фойдаланилган. Тергов бир нечта версияларни кўриб чиқмоқда, улардан бири — жиноятнинг Украина махсус хизматлари томонидан ташкил этилганидир.
«База» телеграм-каналининг хабар беришича, генерал ўзининг Kia Sorento автомобилида бир неча метр юришга улгурган ва шундан сўнг портлаш юз берган. Суратлардан кўринишича, зарба машинанинг олд қисмига тўғри келган.
«Дождь» телеканали маълумотлар базаларига таяниб, 2013 йилда ишлаб чиқарилган Kia Sorento Сарваров номида бўлганини, «Агентство» нашри эса портлаш РФ Бош разведка бошқармасининг бир неча ходимлари истиқомат қиладиган уйдан 150 метр масофада содир бўлганини ёзмоқда.
Маълум қилинишича, 56 ёшли Фанил Сарваров 1992–2003 йилларда Осетин-Ингуш можароси ва Чечен урушида қатнашган. 2015–2016 йилларда Суриядаги ҳарбий операцияларни ташкил этиш ва ўтказиш вазифаларини бажарган. Шунингдек, «Проект» нашри уни Украинага бостириб киришда иштирок этаётган қўмондонлар базасига киритган эди. Генерал 2016 йилдан бери Бош штабнинг тезкор тайёргарлик бошқармаси бошлиғи лавозимида ишлаб келаётган эди.
Эслатиб ўтамиз, худди шундай воқеа 2024 йилнинг декабрида генерал Кириллов билан ҳам содир бўлган ва ўшанда ҳарбий скутерга ўрнатилган портловчи қурилманинг ишга туширилишидан ҳалок бўлган эди. Жорий йилнинг 25 апрелида эса Россия Қуролли кучлари Бош штаби Бош оператив бошқармаси бошлиғининг ўринбосари, 59 ёшли генерал-лейтенант Ярослав Москалик автомобиль портлаши оқибатида ҳалок бўлганди.
