Эрон ва АҚШ ўртасидаги ҳарбий кескинлик яна кучаймоқда. Эрон Ислом инқилоби қўричилари корпуси (ИИҚК) Баҳрайн, Қувайт ва Иорданиядаги АҚШ ҳарбий объектларига зарбалар берганини маълум қилди. Шу билан бирга, Трамп Теҳрон музокараларга қайтмаса, мамлакатнинг энергетика инфратузилмасига ҳужум қилиш билан таҳдид қилди.
ИИҚК маълумотига кўра, зарбалар Баҳрайндаги АҚШ Бешинчи флоти объектлари, Қувайтдаги Америка ҳарбий базаси ҳамда бошқа ҳарбий ва логистика иншоотларига қаратилган. Эрон томони Вашингтон минтақадаги ҳарбий фаоллигини кенгайтиришда давом этса, бундай ҳужумлар яна такрорланишини билдирди.
Бу воқеалар АҚШнинг Эрон ҳудудига тўртинчи кун кетма-кет зарба бериши ҳамда Трамп томонидан Ҳўрмуз бўғози атрофида Эрон кемаларига нисбатан блокада қайта жорий этилгани ортидан содир бўлди.
Эрон ҳарбийлари АҚШни Ҳўрмуз бўғози орқали нефт ва газ ташиш қоидаларини ўзгартиришга уринаётганликда айблаб, агар минтақа энергетика экспорти чекланса, бошқа муҳим энергетика йўналишлари ҳам хавф остида қолишини маълум қилди.
Шу орада Баҳрайн, Қувайт ва Иорданияда ракета хавфи эълон қилинди. Иордания расмийлари учта ракета ҳаво ҳужумидан мудофаа тизимлари томонидан йўқ қилинганини билдирган. Қувайт эса Эрон дронларига қарши ҳаво мудофааси ишга туширилганини маълум қилди.
АҚШ Марказий қўмондонлиги (CENTCOM) эса бир кечанинг ўзида етти соат давомида Эроннинг ўнлаб ҳарбий нишонларига юқори аниқликдаги қуроллар билан зарба берилганини маълум қилди. Баёнотга кўра, ҳужумлар Эроннинг ракета ва дрон салоҳиятини чеклаш ҳамда тижорат кемалари хавфсизлигини таъминлашга қаратилган.
Шу билан бирга, Дональд Трамп Fox News телеканалига берган интервьюсида Теҳрон музокараларга қайтмаса, АҚШ Эроннинг электр станциялари, кўприклари ва бошқа муҳим инфратузилма объектларига зарба беришга тайёрлигини айтди.
