Бугун, 7 апрель куни Сурхондарё вилоятининг Денов туманидаги газ қуйиш шохобчаларидан бирида портлаш содир бўлди. Ҳодиса оқибатида 2 фуқаро куйиш тан жароҳатини олди. Бу ҳақда Фавқулодда вазиятлар вазирлиги хабар берди.
Ёнғин соат 08:24 да туманнинг “Оқтом” МФЙда жойлашган автомобилларга суюлтирилган газ қуйиш шохобчаси ҳудудида содир бўлган. КАМАЗ русумли суюлтирилган (пропан) газ ташувчи махсус автомобилдан сиғимга газини қуйиш вақтида чақнаш содир бўлиб, оқибатда ёнғин келиб чиққан.
Ҳодиса оқибатида 2 нафар фуқаро, шундан бир нафари 10 фоиз, яна бир нафари 3-4 фоиз енгил куйиш тан жароҳати олган.
“Уларни соғлигига хавф йўқ, ҳозирда аҳволи яхши. Ҳалок бўлганлар йўқ”, дейилади хабарда.
Ҳодиса жойига 5 та қутқарув бўлинмалари соат 08:39 да етиб бориб, ёнғин соат 08:42 да ўраб олинган ва 10:10 да тўлиқ ўчирилган.
Воқеа жойига вилоят ФВБ раҳбар ходимлари, Денов тумани Ички ишлар бошқармаси, Соғлиқни сақлаш бошқармаси, “Ҳудудгазтаъминот” раҳбар ва ходимлари чиққан ҳамда ҳодисанинг келиб чиқиш сабабларини аниқлашга ҳаракат қилмоқда.
