Буюк Британия сувлари яқинида ҳафталаб турган Россия жосуслик кемаси уни кузатган британиялик учувчиларга лазер йўналтирди. Бу ҳақда Al Jazeera хабар берди.
Британия бу вазият юзасидан зарурат туғилса, “ҳарбий чоралар” кўришга тайёрлигини эълон қилган. Мудофаа вазири Жон Хили учувчиларига қарши бундай ҳаракатларни “ниҳоятда хавфли” деб баҳолаб, келгусида муносиб жавоб қайтарилишидан огоҳлантирди.
Буюк Британия ҳарбий-денгиз флоти фрегати ва P-8 самолётлари Шотландия шимолидаги сувларда ҳаракатланаётган, разведка маълумотларини тўплашга мўлжалланган “Янтар” кемасини кузатиш учун сафарбар этилганди.
“Россияга ва Путинга хабарим шуки: биз сизни кўриб турибмиз. Нима қилаётганингизни биламиз. Агар ‘Янтар’ (Россия кемаси) шу ҳафта жанубга йўл олса, биз бунга тайёрмиз”, деди Хили.
Бу “Янтар”нинг Британия ҳарбий-ҳаво кучларига қарши бундай ҳаракатни биринчи марта амалга ошириши ҳисобланади. Вазир кема ҳаракатларини “янада синчковроқ кузатиш” учун денгиз флоти қоидалари ўзгартирилганини таъкидлади.
“Агар ‘Янтар’ йўналишини ўзгартирса, бизда ҳарбий чоралар тайёр”, деди у.
Британия ҳаво ва денгиз кучлари мунтазам равишда ўз ҳудудий сувлари атрофидаги потенциал таҳдидларни кузатиб боради. 2022 йилда Украинадаги уруш бошланганидан бери Россия кемалари яқинлашуви тез-тез такрорланмоқда.
Россиянинг Лондондаги элчихонаси айбловларни рад этиб, Британия ҳукуматини “русофобия” ва “ҳарбий истерикани авж олдириш”да айблади. “Тугамайдиган айбловлар”га жавобан элчихона Москванинг “ҳаракатлари Буюк Британия манфаатларига таъсир қилмаслиги ва унинг хавфсизлигини издан чиқаришга қаратилмаганини” таъкидлади.
“Биз Британиянинг сувости алоқаларига қизиқмаймиз”, дейилади баёнотда.
