Наманган вилояти, Учқўрғон туманида жамоат жойида спиртли ичимлик истеъмол қилиб, кўчада кетаётган аёлга нисбатан шаҳвоний шилқимлик қилган 68 ёшли эркак 5 суткага қамалди.
Маълум бўлишича, 1957-йилда туғилган Учқўрғон туманида яшовчи А.Т. 2025-йилнинг 8 октябрь куни соат 14:50 атрофида Кўприкбоши маҳалласи ҳудудида спиртли ичимлик истеъмол қилган. Шу вақтда ёнидан ўтиб кетаётган фуқаро Ш.Р.нинг танасига тегиниб, шаҳвоний хусусиятга эга ҳаракатлар содир этган.
Шунингдек, мазкур ҳолат юзасидан суриштирув ишлари олиб бориш мақсадида профилактика инспектори хизмат хонасига олиб борилган вақтида ИИБ ходимининг қонуний талабларини бажармасдан, шахсига оид маълумотларни беришдан бош тортган.
Жиноят ишлари бўйича Учқўрғон тумани суди қарори билан А.Т. Маъмурий жавобгарлик тўғрисидаги кодексининг 41-1 -моддаси 1-қисми (шаҳвоний шилқимлик қилиш), 187-моддаси 2-қисми (жамоат жойларида алкоголь маҳсулотини истеъмол қилиш) ва 194-моддаси 1-қисмида (ички ишлар органлари ходимининг қонуний талабларини бажармаслик) назарда тутилган ҳуқуқбузарликларни содир этган деб топилган. Унга нисбатан МЖтКнинг 34-моддасига асосан узил-кесил 5 сутка маъмурий қамоқ ҳамда базавий ҳисоблаш миқдорининг 5 баравари миқдорида 2 миллион 60 минг сўм миқдорида жарима жазоси тайинланган.
