Жорий йилда Фаластиннинг босиб олинган Ғарбий Соҳил ҳудудида кунига ўртача 5 та ҳужум содир этилган. Бу ҳақда Бирлашган Миллатлар Ташкилоти матбуот котиби Стефан Дюжаррик кундалик брифингда маълум қилди.
Қайд этилишича, Фаластин ерларини эгаллаган исроилликларнинг ҳужумлари тинимсиз давом этмоқда.
“Бу йил ғарбий соҳилда исроилликлар томонидан содир этилган 1680 та ҳужум қайд этилди. Бу ҳужумлар 270 дан ортиқ аҳоли пунктларида одамларнинг ҳалок бўлишига ёки моддий зарар етишига олиб келди”, дейди БМТ сўзловчиси.
Стефан Дюжарик бу рақам ўртача кунига 5 та ҳужумга тўғри келишини ва босиб олувчи куч сифатида Исроил Ғарбий Соҳилда тинч аҳолининг ҳимояси, жамоат тартибини ва хавфсизлигини таъминлаш бўйича халқаро гуманитар ҳуқуқ ва инсон ҳуқуқларига мувофиқ мажбуриятларга эга эканини таъкидлаган.
Шунингдек, Исроил кучлари Ғарбий Соҳил шимолида ҳарбий амалиётларини кучайтирганини, бунинг оқибатида фаластинликлар учун янги кўчиришлар, ҳаракатланиш чекловлари, мактабларнинг ёпилиши ва хизматлар узилиши хавфи ортаётгани маълум қилинган.
БМТ вакилининг айтишича, Исроил кучларининг кенгайтирилган амалиётлари ғарбий соҳил шимолида 95 мингдан ортиқ фаластинликка салбий таъсир кўрсатган.
