Қашқадарёда отасининг маъракасига 250 кишини чақирган фуқаро жавобгарликка тортилди.
Аниқланишича, Қашқадарё вилояти, Деҳқонобод туманида яшовчи М.А. жорий йилнинг 17 ноябрь куни отаси А.Т. вафот этганлиги учун маърака тадбирларини ўтказиш чоғида белгиланган тартибга риоя қилмаган.
Судда М.А. қилмишига иқрорлик билдириб, отаси 19 июнь куни вафот этгани, шу муносабат билан 17 ноябрь куни маърака маросимини ўтказгани, хонадонига келган 250 га яқин одамга шўрва тарқатгани, ҳаракати ноқонуний эканини билмаганини айтиб, енгиллик сўради.
Жиноят ишлари бўйича Деҳқонобод тумани судининг қарори билан М.А. Маъмурий жавобгарлик тўғрисидаги кодекснинг 192¹-моддасида (тўйлар, оилавий тантаналар ва маърака-маросимлар тартибини бузиш) назарда тутилган ҳуқуқбузарликни содир қилган деб топилди. Унга нисбатан, базавий ҳисоблаш миқдорининг 2 баравари, яъни 824 минг сўм миқдорида жарима жазоси тайинлаган.
