Қашқадарё вилоятининг Кўкдала туманида икки Nexia ва “КамАЗ” юк машинаси иштирокида ЙТҲ содир бўлди.
Вилоят ЙҲХБ матбуот хизматининг маълум қилишича, ҳодиса 24 май куни соат 14:20 ларда Қарши-Еттитом йўналиши D-150 автомобил йўлида содир бўлган. Ижтимоий тармоқларда ҳодиса жойидан олинган видеолар ҳам тарқалганди. Унда икки автомобил аянчли ҳолга келгани, юк машинаси эса ағдарилиб кетгани кўринган.
Расмий хабарда айтилишича, мазкур йўл-транспорт ҳодисасида Nexia-2 автомашинасининг йўловчиси тан жароҳати олиб, шифохонага ётқизилган, қолган ҳайдовчи ва йўловчиларга ҳеч қандай зарар етмаган.
Олиб борилган дастлабки суриштирув ҳаракатлари мобайнида Nexia автомашинаси транспорт воситаларини нотўғри қувиб ўтиши натижасида ушбу йўл-транспорт ҳодисаси содир этилган аниқланган.
Мазкур йўл-транспорт ҳодисаси Қашқадарё вилояти ИИБ ЖХХ ЙҲХБ масъул ходимлари томонидан қонуний расмийлаштирилган.
