Исландия дунёнинг энг қиммат давлатлари рейтингида биринчи ўринга чиқиб олди. Таҳлилчиларнинг маълумотларига кўра, айни пайтда мамлакатдаги нархлар Европадаги ўртача кўрсаткичдан 84 фоизга юқори. Бу ҳақда “Iceland Monitor” хабар берди.
Қайд этилишича, Исландия яшаш учун дунёдаги энг қиммат мамлакатга айланган. Мамлакатдаги нарх-наво даражаси ва иқтисодий вазиятни ўрганган Viska компанияси таҳлилчилари шундай хулосага келган.
Тадқиқот маълумотларига кўра, ҳозирда Исландияда нархлар Европанинг 27 та давлатидаги ўртача кўрсаткичдан 84 фоизга баланд. Таҳлилчиларнинг таъкидлашича, ушбу мамлакат яшаш қиймати бўйича дунёдаги энг қиммат 10 та давлат рўйхатидаги аксарият мамлакатлардан сезиларли даражада ўзиб кетган.
Ваҳоланки, сўнгги 30 йил ичида Исландия ва Европа ўртасидаги ўртача нархлар фарқи тахминан 42 фоизни ташкил этарди. Эндиликда эса бу фарқ қарийб икки бараварга ортган.
Товарлар нархидаги фарқ Шимолий Европанинг бошқа мамлакатлари билан солиштирилганда айниқса яққол кўзга ташланади. Исландияда озиқ-овқат маҳсулотлари ўртача 44 фоизга, гўшт маҳсулотлари эса 71 фоизга қимматроқ. Автомобиллар мамлакат аҳолисига минтақадаги қўшниларига қараганда тахминан 40 фоизга қимматроққа тушмоқда.
Экспертларнинг фикрича, юқори иш ҳақлари бундай қимматчиликни тўлиқ оқлай олмайди. Уларнинг ҳисоблашича, вазиятга юқори импорт божлари ва бозордаги заиф рақобат таъсир кўрсатмоқда.
Шунингдек, таҳлилчилар Исландияда нархлар ҳозирги кунда Европа иқтисодий ҳудуди мамлакатларидагига қараганда икки баравар тезроқ ўсаётганига эътибор қаратган. Шу билан бирга, исландия кронасининг курси ҳозирча нисбатан барқарор (кучли) бўлиб қолмоқда.
Viska компанияси агар инфляция назоратга олинмаса, яқин орада мамлакатда харид қобилиятининг пасайиши, кронанинг қадрсизланиши ва экспорт кўрсаткичларининг ёмонлашиши кутаётганидан огоҳлантирган.
“Исландияда нархлар ҳаддан ташқари юқорилаб кетди”, дейилади тадқиқот хулосасида.
Маълумот учун, 2025 йилнинг кузида Исландия дунёдаги энг қиммат нон сотиладиган мамлакатлар рўйхатидан жой олган. Бундан ташқари, ушбу рейтингдаги кучли ўнликдан Бермуд ороллари, Кайман ороллари, Монако ва Багама ороллари ҳам ўрин эгаллаган.
Энг арзон нон нархлари билан эса Тунис, Эсватини, Афғонистон, Ливия, Чад, Ўзбекистон, Қирғизистон, Қозоғистон ва Озарбайжон давлатлари мақтана оладиган даражадаги кўрсаткичларни қайд этган.
