Ўзбекистонда муомалага чиқарилган нақд пуллар миқдори сезиларли ортиб боряпти. Бу ҳақда Марказий банк эълон қилган статистик рақамларда қайд этилган.
2025 йил 1 ноябрь ҳолатига кўра, Ўзбекистонда пул массаси 344,6 трлн сўмга етди. Таққослаш учун, 2024 йил мос давридаги кўрсаткич 265 трлн сўм бўлган. Бир йиллик ўсиш — 79,6 трлн сўм.
Ўтган ой бошида пул массасининг миллий валютадаги миқдори 282,3 трлн сўмни ташкил этган. Бир йил аввал бу кўрсаткич 206,6 трлн сўм эди.
Мамлакатда муомаладаги нақд пуллар жами миқдори 67,1 трлн сўмга етди. Бир йил илгари (2024 йил 1 ноябрь) мазкур кўрсаткич 54 трлн сўм бўлган. Йиллик ўсиш — 13,1 трлн сўм.
2020-2023-йиллар ноябрь ойлари бошида муомалада бўлган нақд пуллар миқдори қуйидагича:
- 2020 йил — 27,2 трлн сўм;
- 2021 йил — 29,5 трлн сўм;
- 2022 йил — 43,8 трлн сўм;
- 2023 йил — 48,1 трлн сўм.
Маълумот учун, пул массаси — муомаладаги (банк тизимидан ташқаридаги) нақд пуллар, талаб қилиб олингунча ва бошқа депозитлар, шунингдек қимматли қоғозларни (акциялардан ташқари) ўз ичига олади.
Муомаладаги (банк тизимидан ташқаридаги) нақд пуллар — Марказий банк томонидан муомалага чиқарилган барча нақд пуллар бўлиб, бунда Марказий банк ҳамда тижорат банклари кассаларидаги миллий валютадаги нақд пуллар ҳисобга олинмайди.
