Ислом тараққиёт банки ва Ўзбекистон ўртасида инфратузилма ва таълим соҳаларини ривожлантиришга қаратилган икки йирик молиялаштириш битими имзоланди.
Банк расмий сайтида хабар қилинишича, битимларни ИТБ президенти Муҳаммад Ал Жассир ва Ўзбекистон бош вазир ўринбосари, иқтисодиёт ва молия вазири Жамшид Қўчқоров имзолаган.
Биринчи биримга кўра, ИТБ 4Р40 Даштобод–Зомин–Бахмал–Ғаллаорол автомобиль йўлини реконструкция қилиш лойиҳаси учун 70 миллион доллар ажратади. Ушбу маблағ банкнинг умумий 192 миллион долларлик мажбурияти доирасида тақдим этилади. Бу маблағлар ҳисобидан Жиззах вилоятидаги 143 километр ҳудудий автомобиль йўли, шунингдек, 30 километр маҳаллий ва қишлоқ йўллари таъмирланади.
Лойиҳа 200 минг аҳоли учун транспорт тирбандликларини бартараф этишга ва хавфсизликни оширишга қаратилган. М39 халқаро йўлагига олиб борувчи бу муҳим кириш йўлини модернизация қилиш бозорлар ва ижтимоий хизматларга кириш имкониятларини яхшилайди, шунингдек, минтақанинг иқтисодий ва сайёҳлик салоҳиятини очиб беради. Янгиланган йўл М39 халқаро транспорт йўлагига чиқишни енгиллаштириб, ҳудуднинг иқтисодий ва туристик салоҳиятини ошириши кутилмоқда.
Иккинчи битим SmartED таълим лойиҳаси доирасида 94,06 миллион доллар молиялаштиришни назарда тутади. Бу ИТБнинг ушбу ташаббусга йўналтирилган умумий 160,25 миллион долларлик ҳиссасининг бир қисми ҳисобланади.
Лойиҳа доирасида республика бўйлаб 58 та янги таълим муассасаси қурилади, амалдаги мактаблар базасида эса 2 431 та замонавий ўқув синфи ташкил этилади. Лойиҳа компетенсияга асосланган инклюзив таълим тизимини яратишга қаратилган бўлиб, ҳар йили 72 930 нафар ўқувчига фойда келтиради. Шунингдек, 36 115 нафардан ортиқ ўқитувчи ва маъмурий ходимлар малакасини ошириш имконини беради.
Жамшид Қўчқоров 2025 йилнинг февралида Саудия Арабистонида Ислом тараққиёт банки президенти Муҳаммад Ал Жассир билан учрашиб, Ўзбекистонда транспорт инфратузилмаси ва таълимни ривожлантириш, жумладан, йўл инфратузилмаси ҳамда таълим соҳасида замонавий лойиҳаларни амалга ошириш масалалари юзасидан муҳокамалар олиб борганди.
Ислом тараққиёт банки 1975 йилда ташкил этилган халқаро молиявий институт бўлиб, унинг бош офиси Саудия Арабистонининг Жидда шаҳрида жойлашган. Банкнинг асосий мақсади исломий молиявий тамойиллар асосида аъзо давлатларнинг иқтисодий тараққиётини қўллаб-қувватлаш ва уларнинг фаровонлигини оширишдан иборат.
