Озарбайжон президенти Илҳом Алиев мамлакат армиясини НАТО стандартларига ўтказиш ҳақида баёнот берди. Сиёсатчи бу ҳақда 6 ноябрь куни альянс вакиллари билан учрашувда маълум қилди.
“Давлат раҳбари Озарбайжон армиясининг НАТО стандартларига мослаштирилаётгани ва бу борада Туркия армияси билан яқиндан ҳамкорлик қилаётганини таъкидлади”, дейилади Озарбайжон президенти сайтида.
Тадбирда НАТОдаги Туркия, Греция, Венгрия, Черногория, Нидерландия, Шимолий Македония, Норвегия, Словакия, Словения, Швеция, Чехия, Португалия ва Испаниянинг доимий вакиллари, шунингдек, АҚШ ва Франция вакиллари ўринбосарлари иштирок этган.
Алиевнинг таъкидлашича, Озарбайжон “ўтган аср бошида мустақилликка эришган пайтдан бери асосий мақсадига — ўз ерларини босқинлардан озод этишга эришди” ва эндиликда армияни модернизация қилиш йўлини давом эттиради.
Россия томони муносабати
МДҲ ишлари бўйича қўмита раиси биринчи ўринбосари Константин Затулиннинг фикрича, Алиев армияни НАТО стандартларига ўтказиш ҳақида гапирар экан, Озарбайжон “ўз мудофаа ва сиёсий чизиғини Россия манфаатларидан мутлақо мустақил равишда қураётганини” тан олди.
“Озарбайжон ва Туркия амалда “умумий армия ва қўмондонлик, ҳарбий-сиёсий иттифоққа эга, шунинг учун бунга ажабланмаса ҳам бўлади”, деб таъкидлади у.
Август ойида Алиев дунёдаги жараёнлар олдиндан айтиб бўлмаслиги сабабли мамлакатни урушга тайёрлаётганини айтганди.
“Биз ҳеч кимга бизга қарши душманлик ҳаракатлари ҳақида ўйлашни маслаҳат бермаймиз… Бизнинг етарлича кучли иттифоқчиларимиз бор”, дея огоҳлантирган у. Президентнинг сўзлари Озарбайжоннинг Россия билан муносабатлари ёмонлашгани фонида янграган эди.
