Польша бош вазири Дональд Туск мамлакат Европа Иттифоқи таркибидан чиқиб кетиши хавфи борлигини айтди. У бу ҳақда X ижтимоий тармоғида маълум қилди.
Бош вазирнинг таъкидлашича, Польшанинг Евроиттифоқдан чиқиши эҳтимоли энди гипотетик масала эмас. У мамлакатдаги евроскептик кучлар Европани заифлаштиришга интилаётган “ташқи ўйинчилар манфаатларини кўзлаб” ҳаракат қилганини айтди.
“Россия, Американинг МАGА ҳаракати ва Виктор Орбан (Венгрия бош вазири) бошчилигидаги Европа ўнглари Европа Иттифоқини йўқ қилмоқчи. Бу Польша учун фалокат бўлади”, деди Туск.
У Польшанинг Европа Иттифоқидан чиқиши хавфи ўнг кучлар сиёсати ва президентнинг молиявий ташаббусларга қўйган ветоси туфайли кучайганини таъкидлади. Бундай сценарий Европа Иттифоқи ичидаги бирликка ҳам путур етказиши мумкин.
Дональд Туск “Конфедерация” фраксияси ҳамда “Ҳуқуқ ва адолат” (PiC) партиясининг кўплаб вакиллари амалда мамлакатни Брюссел билан алоқаларни узишга ундаганини маълум қилди.
Молиявий блокада ва унинг оқибатлари
Президент Карол Навроцкий Польшага Европа Иттифоқидан 43,7 миллиард евро миқдорида мудофаа кредитлари олиш имконини берувчи қонунни блоклаганидан сўнг вазият янада кескинлашди. Бу маблағ армияни молиялаштиришга мўлжалланган бўлиб, ҳарбий харажатлар ялпи ички маҳсулотнинг 5 фоизигача етиши режалаштирилган эди. Бош вазир мухолифатнинг Европа Иттифоқидан чиқиш бўйича қарашлари жиддий таҳдид эканини таъкидлади.
“Полексит (Polexit) бугунги кунда ҳақиқий таҳдиддир! Буни конфедерациялар ҳам, PiC партияси ҳам хоҳлайди. Мен уларни тўхтатиш учун қўлимдан келганини қиламан”, деди Туск.
Экспертлар фикрича, аҳолининг аксарияти Европа Иттифоқини қўллаб-қувватлашига қарамай, ҳар тўртинчи поляк аллақачон блокдан чиқиш учун овоз беришга тайёр. Бу эса Буюк Британиянинг Европа Иттифоқидан чиқиши (Брексит)олдидан кузатилган кайфиятни эслатади.
Шунга қарамай, Дональд Туск Варшава армияни мустаҳкамлаш учун маблағ топишига ишонтирди. У “хавфсизликни мустаҳкамлашга тўсқинлик қилишларига йўл қўймасликка” ваъда берди.
