Индонезияда 19 ноябрь куни Ява оролининг энг баланд нуқтаси бўлган Семеру вулқони тўсатдан отилди. Ҳодиса оқибатида хавф остида қолиб кетган 178 нафар киши 20 ноябрь куни қутқариб олинди. Бу ҳақда The Independent хабар берди.
Жами 178 киши – алпинистлар, юк ташувчилар, йўлбошчилар ва сайёҳлар – Шарқий Яванинг Лумажанг туманидаги 3676 метр баландликда жойлашган (Маҳамеру номи билан ҳам танилган) чўққига кўтарилаётган бўлган. Улар вулқон кутилмаганда отилганда Рану Кумболо лагер майдонида қолиб кетган. Расмийларнинг таъкидлашича, лагер майдони 8 километрлик асосий хавф зонасидан ташқарида жойлашганини таъкидламоқда. Бироқ алЬпинистлар вулқон кулига дуч келиб, заҳарланган бўлиши мумкин.
Индонезия Геология агентлиги раҳбари Муҳаммад Вафиднинг таъкидлашича, Шарқий Ява провинциясидаги Семеру вулқони 19 ноябрь куни тўхтовсиз қайноқ кул булутлари ҳамда тош, лава ва газ аралашмаси оқимларини 13 километр масофагача отган. Вафид тоғ ён бағирларидан пирокластик зичлик оқимлари (куйган газ, кул ва тош) ҳаракати содир бўлганини айтган.
У одамларни лава оқими йўли бўлган Бесук Кобокан дарёси бўйлаб ҳаракатланувчи ҳудудлардан узоқ туришга чақирган ва хавф зонасининг кенгайтириш масаласи кўриб чиқилаётганини қўшимча қилган.
Қурбонлар қайд этилмади
Офатларни бартараф этиш миллий агентлиги вакили Абдул Муҳарининг айтишича, Лумажанг туманидаги энг юқори хавф остида бўлган учта қишлоқдаги 1000 га яқин аҳоли ҳукумат бошпаналарига эвакуация қилинган. Ҳеч қандай қурбонлар ҳақида хабар берилмаган.
Семерунинг сўнгги йирик отилиши 2021 йил декабрь ойида қайд этилган эди. Ўшанда лой қатламлари остида қолган қишлоқларда 51 киши ҳалок бўлган ва юзлаб киши куйиш жароҳатларини олган эди. Ҳодисада 10 000 дан ортиқ кишини эвакуация қилишга тўғри келган.
Зилзила хавфи ҳам мавжуд
Германия Геофанлар тадқиқот маркази 20 ноябрь куни Индонезиянинг Серам оролида 6 магнитудали зилзила содир бўлганини маълум қилган. Зилзила эпицентри 136 километр чуқурликдалиги қайд этилган. 280 миллиондан ортиқ аҳолига эга бўлган Индонезия Тинч океанининг “Олов ҳалқаси” деб аталадиган ҳудудида жойлашган бўлиб, бу ер зилзилалар ва вулқон фаоллигига мойил.
