Чехияда муайян ҳуқуқий ва молиявий муаммолар туфайли қийин аҳволда қолган ўзбекистонлик эркак Ўзбекистоннинг дипломатик ваколатхонаси вакиллари кўмагида ватанга қайтарилди.
Маълум қилинишича, фуқаро У.М. 2017-йилда Польша орқали Чехияга ишлаш мақсадида келган бўлиб, вақт ўтиши билан биометрик паспортининг амал қилиш муддати тугаб қолган. Ҳужжатни ўз вақтида янгиланмагани сабабли, у мамлакатда ҳуқуқий жиҳатдан ноқулай вазиятга тушиб қолган.
У кейинчалик Ўзбекистон элчихонасининг консуллик бўлимига мурожаат қилган.
Бундан аввал Россиянинг Красноярск ўлкасида оғир ҳаётий вазиятга тушиб қолган Ўзбекистон фуқароларига зарур амалий ёрдам кўрсатилгани ҳақида хабар берилганди.
Ноябрь ойида Ўзбекистоннинг Новосибирск шаҳридаги Бош консулхонаси ҳамда Миграция агентлиги ваколатхонаси кўмагида оғир моддий аҳволга тушиб қолган ҳамюртимиз ва унинг икки фарзанди Ўзбекистонга қайтарилганди. Бундан аввал Украинада қулликда сақланган 19 нафар фуқаро Ўзбекистонга қайтарилган эди. 28 октябрь куни Ўзбекистон фуқаролари Киевдан Кишинёвга автотранспортда етказилди. Молдовада бўлиш вақтида улар хавфсиз яшаш шароитлари, озиқ-овқат ва зарур ёрдам билан таъминланди. 2 ноябрь куни эса фуқаролар Кишинёв—Истанбул—Урганч йўналиши бўйича парвоз қилиб, 3 ноябрь куни Ўзбекистонга етиб келган.
