Бугун, 31 октябрь куни Баҳрайн пойтахти Манама шаҳри мезбонлик қилаётган ёшлар ўртасидаги III Осиё ўйинлари якунига етади. Унда Ўзбекистон спортчилари 81 та медалга эга чиқди.
Ўзбекистон делегацияси Баҳрайнда якунига етаётган III Осиё ёшлар ўйинларидаги иштирокини тугатди. Осиёнинг 45 мамлакатидан 4000 нафардан ортиқ ёш спортчиси иштирок этган мазкур мусобақада ўзбекистонлик ёш атлетлар 37 та олтин, 16 та кумуш ва 28 та бронза, жами 81 та медаль билан умумжамоа ҳисобида Хитойдан кейин иккинчи ўринни эгаллади.
Хитой спорт делегацияси катта фарқ билан биринчи ўринга эга чиқди. Чин юрти спортчилари 63 та олтин, 49 та кумуш, 35 та бронза, жами 147 та медаль билан тақдирланди. Топ-10 таликдан Эрон, Таиланд, Ҳиндистон, Гонконг, БАА, КХДР ва Хитой Тайпейи терма жамоалари жой олди.
Ушбу натижанинг Ўзбекистон делегацияси учун ёшлар ўртасидаги Осиё ўйинларидаги энг яхши натижа бўлди. Ўзбекистон I Осиё ёшлар ўйинларида 3 та бронза, II Осиё ўйинларда эса 1 та олтин, 2 та кумуш ва 3 та бронза медалларини қўлга киритган бўлса, бу сафар ёш спортчилар 81 та медалга эга чиқди.
Маълумот учун, Ўзбекистоннинг қўшнилари орасида Тожикистон делегацияси 2 та олтин, 3 та кумуш, 15 та бронза медаль жамғарган ҳолда 18, Қирғиз Республикаси 1 та олтин, 9 та кумуш, 11 та бронза билан 21, Афғонистон 1 та кумуш, 2 та кумуш, 3 та бронза билан 24, Туркманистон эса 1 та олтин, 1 та кумуш, 4 та бронза медални қўлга киритган ҳолда умумжамоа ҳисобида 27-ўринни банд этди.
