Қозоғистон президентининг собиқ маслаҳатчиси Ержан Бабакумаров Остонада таниши билан муштлашув вақтида ҳалок бўлди. Бу ҳақда полицияга таяниб, Оrda.kz хабар берди.
Маълум қилинишича, 56 ёшли Бабакумаров ўзининг 36 ёшли эркак таниши билан жанжаллашиб қолган.
“Низо муштлашувга айланиб кетган. Оқибатда 56 ёшли эркак (собиқ маслаҳатчи) яшаб қолиши учун мос келмайдиган тан жароҳатлари олган ва ҳалок бўлган. Қотиллик бўйича жиноий иш қўзғатилди”, дейилади полиция хабарида.
Таъкидланишича, гумонланувчи қўлга олиниб, вақтинчалик сақлаш изоляторига жойлаштирилган. Бабакумаров 1969 йил 2 мартда Талдиқўрғон вилоятида (ҳозирда Олмаота вилояти таркибига киради) туғилган. 1991 йилда Ал-Форобий номидаги Қозоғистон давлат университетини сиёсий тарих ўқитувчиси мутахассислиги бўйича тамомлаган.
Давлат тузилмаларида 1996 йилдан бери ишлаб келган. Дастлаб Олмаота маъмуриятида, кейин президент маъмуриятида (Нурсултон Назарбоев даврида), мамлакат Маданият вазирлигида, бош вазир девонида фаолият юритган. Тўқаев 2019 йил март ойида президент бўлганида, Бабакумаров апрель ойида унинг маслаҳатчиси лавозимини эгаллаган, бироқ июль ойида уни тарк этган.
Шундан сўнг 2022 йил февралигача Олмаота ҳокими ўринбосари бўлган, яъни ўша йилнинг январь ойида шаҳарни қамраб олган тартибсизликлардан сўнг лавозимидан кетган. Оrda.kz’нинг қайд этишича, шундан сўнг у омма эътиборидан узоқлашган. Бабакумаровнинг хотини, бир ўғли ва бир қизи бор.
