Жорий йилнинг 26 март куни Россиянинг Уст-Луга посёлкасидаги қурилиш майдонида оммавий муштлашувда иштирок этган Қозоғистон фуқаролари ҳибсга олинди. Бу ҳақда “Tengrinews” хабар қилди.
Қайд этилишича, можаро Қозоғистон ишчилари билан маҳаллий қўриқчилар ўртасидаги зиддиятдан бошланган. Дастлаб, тартибсизликларда бир неча юз киши қатнашган. Ҳодисадан сўнг 30 дан ортиқ шахс ушланган, аммо дастлабки терговдан кейин уларнинг аксарияти қўйиб юборилган.
Айрим шахсларга, жумладан, Қозоғистон фуқароларига маъмурий ҳуқуқбузарлик бўйича 10 сутка қамоқ жазоси тайинланган. Яна уч нафар Қозоғистон фуқароси устидан тергов давом этмоқда.
Жароҳатланган ёки тиббий ёрдамга муҳтож фуқаролар йўқ. Барча Қозоғистон фуқароларига зарур консуллик-ҳуқуқий ёрдам кўрсатилмоқда.
