Ўзбекистонда Суриядаги терроризмни молиялаштириш жиноятини содир этган бир гуруҳ шахслар қўлга олинди. Бу ҳақда Давлат хавфсизлик хизмати хабар берди.
Маълум қилинишича, ДХХ томонидан ўтказилган тезкор тадбирда Тошкент шаҳри, Самарқанд, Бухоро, Андижон ва Фарғона вилоятларида яшовчи, 1987 ва 1998 йиллар оралиғида туғилган 8 нафар фуқаро Сурия давлатидаги “Ғуроба катибаси” террористик ташкилоти медиа-блогери, Қирғиз Республикаси фуқароси, 1996 йилда туғилган Абдулмуҳсин Усмоновнинг ғоявий-психологик таъсирлари оқибатида унга тегишли ҳисоб-рақамларга пул ўтказиб бергани аниқланган.
Қайд этилишича, “Саад Мухтор” тахаллусли мазкур шахс Telegram мессенжери орқали Фаластинда жабр кўрган мусулмонларга эҳсон қилиш ниқоби остида пул йиғиш билан шуғулланган. Тўпланган маблағлар эса Суриядаги террорчилар учун сарфланган.
Суд ҳукми билан қонунбузарларнинг 7 нафарига 3 йилдан 8 йилгача озодликдан маҳрум қилиш, 1 нафарига 4 йил 4 ой муддатга озодликни чеклаш жазоси тайинланган.
Шу билан бирга, ДХХ фуқароларни ижтимоий тармоқлардаги шубҳали хайрия чақириқларига ишониб, алданиб қолмасликка чақирган ҳамда Жиноят кодексининг 155-3-моддасига кўра, терроризмни молиялаштириш – 15 йилгача озодликдан маҳрум қилиш билан жазоланишини қайд этган.
