Ўзбекистонда 11 ойда 8,5 миллион литрдан ортиқ сифатсиз нефть маҳсулотлари аниқланди. Бу ҳақда Электр энергияси, нефть маҳсулотлари ва газдан фойдаланишни назорат қилиш инспекцияси хабар қилди.
Қайд этилишича, жорий йилнинг 26 ноябрдан 2 декабрь кунига қадар ўтказилган назорат тадбирларида 90 та АЁҚШдан 191 та намуна олинди. Таҳлиллар натижасида, 23 та ҳолатда 306 430 литр нефть маҳсулотлари давлат стандарт талабларига жавоб бермаслиги маълум бўлган.
2025-йилнинг 11 ойи давомида эса тегишли сифат назорати тадбирлари давомида 632 та объект ўрганилган. Бунда 210 та объектда 8 576 466 литр нефть маҳсулотлари сифатсизлиги аниқланиб, сотувга чиқарилиши олди олинган. Аниқланган ҳолатлар юзасидан маҳсулот сифатини тиклаш бўйича кўрсатмалар берилиб, унинг бажарилиши назоратга олинган.
Тошкент шаҳри ва вилоятида ҳам 70 та заправкадан 146 та намуналар олиниб, 18 та ҳолатда 205 389 литр нефть маҳсулотлари давлат стандарт талабларига жавоб бермаслиги очиқланган.
Ўзбекистонда президентнинг 18 ноябрдаги қарорига асосан 2025 йил 1 декабридан бошлаб Аи-80 бензини сотуви ҳам тўхтатилганди. Ушбу ишлар назоратига Электр энергияси, нефть маҳсулотлари ва газдан фойдаланишни назорат қилиш инспекцияси ҳамда Экология қўмитаси масъул этиб тайинланган.
