Ўз ҳудудида Россия ядро қуролларини жойлаштирган Беларусда Москва билан ҳамкорликда ядровий ўқув машғулотлар бошланди. Бу ҳақда Reuters хабар берди.
“Машғулотлар давомида Россия томони билан ҳамкорликда ядровий ўқ-дориларни етказиб бериш ва уларни қўллашга тайёрлаш чораларини амалда бажариш режалаштирилган”, дейилади Беларусь Мудофаа вазирлиги баёнотида.
Вазирликнинг билдиришича, ўқув машғулотлари ҳарбийларнинг мамлакатнинг турли ҳудудларида ядро қуролини ишга солишга тайёрлигини синовдан ўтказади. Асосий мақсад — Беларусдаги режалаштирилмаган ҳудудлардан туриб жанговар топшириқларни бажариш қобилиятини текшириш ва шахсий таркибнинг малакасини оширишдан иборат.
“Асосий эътибор яширин ҳаракатланиш, узоқ масофаларга кўчиш ҳамда куч ва воситалардан фойдаланиш ҳисоб-китобларини машқ қилишга қаратилади”, дея қўшимча қилди вазирлик.
Беларусь Россия, Украина ва НАТОга аъзо бўлган учта давлат билан чегарадош ҳисобланади. Президент Александр Лукашенко 2023 йилда — Россиянинг Украинага бостириб киришидан бир йил ўтиб — Россия тактик ядровий ракеталарини ўз мамлакатида жойлаштиришга рози бўлган эди. Россия президенти Владимир Путин ушбу қуролларни қўллаш назорати тўлиқлигича Москвада қолишини билдирган.
Уруш давомида Путин Россиянинг ядровий қудрати ҳақида бир неча бор эслатиб ўтди. Ўтган ҳафтада Путин Россия йил охиригача ўзининг янги “Сармат” ядровий ракетасини фойдаланишга топширилишини маълум қилган. Шунингдек, у Москва ўз ядровий кучларини модернизация қилишда давом этишини айтган.
Беларусь томони ҳозирги ўқув машғулотлари бирон бир бошқа давлатга қарши қаратилмаганини таъкидлади. Мамлакат расмийларига кўра, бу машқлар минтақада хавфсизликка таҳдид туғдирмайди.
