Apple ўзининг биринчи букланадиган смартфонини iPhone Duo номи остида эълон қилди. Шу тариқа, компания нафақат янги iPhone, балки янги бош ижрочи директор (CEO) Жон Тернус билан ҳам ўзи учун янги даврга қадам қўймоқда.
Смартфон дизайни тўлиқ тасдиқланди: у кўзга ташланадиган букланиш чизиғи бўлмаган эгилувчан дисплейга эга. Ички экраннинг диагонали 7,6 дюймни, ташқи экран эса 5,4 дюймни ташкил этди.
Унда ҳам Dynamic Island мавжуд, бироқ у жуда кичик ва фақат очиқ ҳолатда кўринади. Шу билан бирга, олд камера экран остига яширилган.
iPhone Duo ҳар иккала экранда ҳам USB-C версиясидаги Apple Pencil’ни қўллаб-қувватлайди. Dock панели ва асбоблар сатри iPhone Duo’нинг кичик экранида ўнг томонда жойлашган.
iPhone Duo’ни ҳар қандай ҳолатда буклаш мумкин ва iOS тизими интерфейсни тегишли вазиятга мослаштиради.
Apple Netflix ва бошқа оммабоп дастурлар ишлаб чиқувчилари билан биргаликда иловалар интерфейсини iPhone Duo’нинг янги экранига мослаштирган.
Алоқа учун Apple’нинг фирма модеми – C2 жавоб беради. У маълумотларни 50 фоизга тезроқ юклайди ва 5G mmWave стандартини қўллаб-қувватлайди. Шу билан бирга, у 15 фоизга камроқ энергия сарфлайди.
iPhone Duo ичига кун бўйи автоном ишлашни таъминлайдиган иккита аккумулятор ўрнатилган: ички экрандан фойдаланилганда 31 соат ва ташқи экранда 44 соат. 50 фоизгача қувват олиш учун 20 дақиқа кифоя қилади.
iPhone Duo нархи 1999 доллардан бошланади, олдиндан буюртмалар 16 октябрда очилади, сотувлар эса 23 октябрдан бошланади.
Маълумот учун, Samsung биринчи марта букланадиган экранга эга смартфони – Galaxy Fold’ни 7 йил олдин – 2019 йил 20 февраль куни Сан-Францискода ўтказилган “Unpacked” тақдимотида расман намойиш этган.
