Россиянинг кеча, 24 июль куни Украинанинг Киев вилоятига берган баллистик ракета зарбаси оқибатида мудофаа саноатига бағишланган тадбирда 10 киши ҳалок бўлди, қарийб 100 киши жароҳатланди. Бу ҳақда Украина расмийлари маълум қилди.
Украина Фавқулодда вазиятлар хизмати қутқарув ишлари ҳодиса жойида якунланганини билдирган. Украина Президенти Владимир Зеленский бу ҳужумга изоҳ бериб, ҳодисани Россиянинг террори деб атаган.
“Бироқ биз минг марта айтдикки, уруш шароитида, бундай душманга қарши курашаётган пайтда, одамлар кўп тўпланадиган ҳар қандай қурол-яроғ кўргазмаларини, айниқса турар жойлар яқинида ўтказиш мутлақо қабул қилиб бўлмайди”, деган у.
Дрон ишлаб чиқарувчилар уюшмаси томонидан ташкил этилган тадбир пойтахт чеккасидан унча узоқ бўлмаган ҳудудда ўтказилаётган эди. Украина Қуролли кучлари Бош штаби вакили тадбир ҳарбий идора тасарруфидаги объектда ўтмаганини, бироқ бундай тадбирларни ташкил этишда “энг юқори хавфсизлик чоралари” кўрилиши кераклигини айтган.
Киев вилояти губернатори вазифасини бажарувчи Руслан Олийник бугун, 25 июль куни вилоятда мотам куни деб эълон қилинишини маълум қилган. Украина Мудофаа саноати кенгаши ракета зарбаси Украина мудофаа саноати вакиллари иштирок этаётган объектга берилганини тасдиқлаган. Кенгаш ўзини тадбир ташкилотчиси эмаслигини билдирган.
Украинанинг First Contact дрон компанияси асосчиси Валерий Боровик маҳаллий ОАВга ракета мудофаа саноати кўргазмаси ўтказилаётган машғулот полигонига тушганини айтган. Украина Бош прокурори Руслан Кравченко тадбирни ташкил этиш ва ўтказишда мансаб вазифаларини лозим даражада бажармаслик эҳтимоли юзасидан жиноят иши қўзғатилганини маълум қилган.
Шунингдек, шарқий Украинадаги Славянск шаҳрида Россия авиация бомбаси ҳужуми оқибатида беш киши ҳалок бўлган, тўққиз киши яраланган. Бу ҳақда вилоят губернатори Вадим Филашкин хабар қилди. Унинг айтишича, кечқурун шаҳарга берилган яна бир Россия зарбаси натижасида 16 киши жароҳатланган ва турар жой биноларига зарар етган.
Бундан ташқари, Украинанинг шимолидаги Россия билан чегарадош Суми вилоятида Россия дрони ҳужуми икки кишининг ҳаётига зомин бўлган. Бу ҳақда вилоят губернатори Олег Григоров Telegram орқали маълум қилди. Шунингдек, жануби-шарқдаги Запорижжя шаҳрига берилган Россия зарбаси савдо марказида ёнғин келтириб чиқарган ва бир неча киши жароҳат олган.
Россия ҳам, Украина ҳам 2022 йил февралда Россиянинг кенг кўламли босқини билан бошланган уруш давомида тинч аҳолини атайлаб нишонга олганини рад этиб келади.
