Ғазо секторининг жанубидаги Хон Юнус шаҳрида Исроил авиацияси томонидан икки йил аввал бомбардимон қилинган бино вайроналари остидан 25 нафар фаластинликнинг жасади топилди. Бу ҳақда Anadolu хабар берди.
Ал-Эстал оиласи фожиаси
Вайроналар остидан олиб чиқилганлар орасида ёш болалар ва бир нафар журланист ходими ҳам бор. Ҳалок бўлганлар — бир хонадоннинг 25 нафар аъзоси бўлиб, барчаси Ал-Эстал оиласига мансуб. 25 декабрь куни топилган жасадлар Носир касалхонаси моргидан олиниб, дафн маросими ўтказилди ва шаҳар қабристонига қўйилди.
Оила оқсоқолларидан бири Абдулҳамид ал-Эсталнинг сўзларига кўра, мазкур бино 2023-йилнинг декабрь ойида бомбардимон қилинган.
“Ўшанда бино ичида 60 га яқин одам бор эди. Аввалроқ 30 кишининг жасади топилган эди, кеча яна 25 кишини олиб чиқдик. Уларни олиб чиқишга деярли икки йил давомида имкон бўлмади”, деди у.
Абдулҳамиднинг таъкидлашича, уларнинг катта оиласи шу вақтга қадар 700 га яқин аъзосини, жумладан, шифокорлар, журналистлар ва болаларини йўқотган. Топилганлар орасида журналист Ҳиба ал-Абадила ҳам борлиги тасдиқланди. Фаластин Журналистлар уюшмаси раиси ўринбосари Таҳсин ал-Эстал ушбу ҳодисани жиноят деб атади.
“Журналист Ҳиба ал-Абадила ва унинг оила аъзоларининг жасади орадан шунча вақт ўтиб топилиши оккупация кучлари томонидан халқимизга нисбатан содир этилаётган жиноятларнинг қанчалик оғир ва давомли эканини кўрсатади”, деди у.
У ҳозирда оила аъзолари вайронага айланган чодирларда, иссиқ ва совуқдан ҳимояланмаган шароитда яшаётганини айтиб, дунё ҳамжамиятидан ҳеч бўлмаганда вайроналарни тозалашда ёрдам беришни сўрамоқда.Ғазо Фуқаро мудофаа бошқармаси жасадлар 24 декабрь куни бинонинг бетон уюмлари остидан чиқарилганини тасдиқлаган. Маълумотларга кўра, Исроилнинг ушбу ҳужуми оқибатида ўша пайтда жами 63 киши, жумладан, аёллар ва кексалар ҳалок бўлган эди.
