Хотин-қизлар ва болалар ҳуқуқ ҳамда эркинликлари ҳимоясини янада кучайтиришга қаратилган қонун лойиҳаси муҳокамага қўйилган. Бу ҳақда Адлия вазирлиги хабар қилди.
Лойиҳага асосан, ён шажара бўйича 2, 3 ва 4-даражадаги қариндошлар, тоға ва амаки, амма ва хола ўз жиянлари билан, шунингдек, тоғавачча, амакивачча, аммавачча ҳамда холаваччалар ўртасида никоҳ тузишга йўл қўйилмаслиги белгиланмоқда.
Агар никоҳланувчилардан бири фарзандликка олинган ёки ўгай фарзанд бўлса ва улар аслида қон-қариндош бўлмаса, бу тақиқ уларга татбиқ этилмайди.
Никоҳга киришни хоҳловчиларнинг аризасига кўра ҳомиладорлик, бола туғилиши билан боғлиқ ҳолатларда никоҳ давлат рўйхатидан ўтказиладиган жойдаги туман, шаҳар ҳокими никоҳ ёшини кўпи билан 1 йилга камайтириши мумкин.
Етарли ёшга тўлмаган шахс билан ҳақиқатда никоҳ муносабатларига киришиш, шундай қилмиш учун маъмурий жазо қўлланилганидан кейин содир этилган бўлса, БҲМнинг 50 бараваридан 100 бараваригача, яъни 20 миллион 600 минг сўмдан 41 миллион 200 минг сўмгача жарима ёки 240 соатдан 300 соатгача мажбурий жамоат ишлари ёхуд 2 йилгача ахлоқ тузатиш ишлари билан жазоланиши белгиланмоқда.
Амалдаги қонунчиликка кўра, ушбу жиноят учун БҲМнинг 20 бараваридан 30 бараваригача, яъни 8 миллион 240 минг сўмдан 12 миллион 360 минг сўмгача миқдорда жарима ёки 240 соатгача мажбурий жамоат ишлари ёхуд 1 йилгача ахлоқ тузатиш ишлари жазоси берилади.
