Сурия ҳукумати Россия ҳарбийларидан мамлакат шимолидаги Қамишли аэродромини тарк этишни сўраши кутилмоқда. Бу ҳақда вазиятдан хабардор суриялик манбаларга таяниб “Haqqin.az” хабар берди.
Манбага кўра, ушбу масала бўйича музокаралар Қамишли шаҳри жойлашган Хасеке провинцияси курд тузилмалари назоратидан марказий ҳукумат юрисдикциясига ўтганидан сўнг бошланиши мумкин.
Маълум қилинишича, 20 январь оқшомида Дамашқ курд қўмондонларига Хасекени ҳукуматга тинч йўл билан интеграция қилишга рози бўлиш учун тўрт кун муҳлат берган. Таъкидлаш жоизки, ушбу провинция курдларнинг сўнгги таянчи бўлиб қолмоқда.
Хабарда айтилишича, “Сурия демократик кучлари” (СДК) гуруҳи ҳудудни топширганидан сўнг Дамашқ Москва билан авиабаза бўйича мулоқотга киришади.
“Менимча, руслардан Қамишлини бутунлай тарк этиш сўралади. Энди уларнинг у ерда қиладиган иши қолмади”, дея тушунтирди манба.
