Россия Эроннинг минтақадаги ҳарбий ҳаракатларини қўллаб-қувватлаш мақсадида АҚШ ҳарбий кемалари ва самолётларининг жойлашуви ҳақидаги махфий маълумотларни Теҳрон билан баҳам кўрмоқда. Бу ҳақда Washington Post нашрининг учта хабардор манбасига таяниб, BBC хабар берди.
“Москва ва Теҳрон ўртасидаги бу ҳамкорлик тасодифий эмас, балки анча кенг кўламли ташаббусга ўхшайди”, дейилади хабарда манбага таяниб.
Ҳозирча Россия томонидан кўрсатилаётган ёрдамнинг аниқ кўлами ва чегаралари маълум эмас. Бироқ манбаларнинг таъкидлашича, урушнинг биринчи ҳафтасида Эроннинг Америка нишонларини мустақил равишда аниқлаш ва кузатиш қобилияти сезиларли даражада заифлашган. Айнан шу бўшлиқни тўлдиришда Россиянинг разведка маълумотлари муҳим рол ўйнаётган бўлиши мумкин.
Россиядан фарқли ўлароқ, Пекин ушбу можарода четда туришни афзал кўрмоқда. Таъкидланишича, Хитой ҳозирча Эронга ҳеч қандай ҳарбий ёки разведка ёрдамини тақдим этаётгани йўқ.
Россия ва Хитойнинг Вашингтондаги элчихоналари мазкур вазият юзасидан Washington Post сўровига жавоб бермади. Пентагон эса ушбу маълумот бўйича изоҳ беришдан расман бош тортди.
