Тошкентда Lacetti’да йўл-патрул хизмати ходимларининг тўхташ талабига бўйсунмай қочган йигитларга нисбатанн жиноят иши қўзғатилди. Бу ҳақда Жамоат хавфсизлиги департаменти ахборот хизмати хабар берди.
Қайд этилишича, ички ишлар органлари ходимларига қаршилик кўрсатиш ҳолати бўйича икки нафар фаол иштирокчи — 2007 йилда туғилган Амирхон Сафарбоев ва 2009 йилда туғилган Муҳаммадазиз Умурзоқовнинг ҳаракатлари юзасидан Жиноят кодексининг 219-моддаси иккинчи қисми аломатлари билан жиноят иши қўзғатилган.
Мазкур шахслар Жиноят-процессуал кодексининг 221-моддаси тартибида ушланган. Учинчи иштирокчи — 2009 йилда туғилган Асилбек Остонов ҳаракатларига ҳам ҳуқуқий баҳо берилиши белгиланган. Ҳозирда у вояга етмаганларга ижтимоий-ҳуқуқий ёрдам кўрсатиш марказига жойлаштирилган.
Маълум қилинишича, ҳозирда жиноят иши доирасида зарур процессуал ҳаракатлар олиб борилмоқда. Тергов якунларига кўра, қонуний процессуал қарор қабул қилинади.
Аввалроқ 28 февралдан 1 мартга ўтар кечаси Тошкентда давлат рақам белгисиз Lacetti автомобили йўл-патрул хизмати ходимларининг тўхташ талабига бўйсунмай бир неча кўча бўйлаб қочгани хабар қилинганди. Ҳодиса Чилонзор тумани Бунёдкор шоҳкўчасидаги Камолон кўприги устида профилактик-оператив рейд вақтида содир бўлган.
Тезликни ошириб ҳаракатланган автомобиль Кичик ҳалқа автомобиль йўли ҳамда Дўмбиробод кўчалари бўйлаб қочишда давом этган. Қочиш жараёнида Lacetti бошқа транспорт воситаси билан тўқнашиб йўл-транспорт ҳодисасини содир этган бўлса-да, ҳайдовчи воқеа жойини тарк этиб ҳаракатни давом эттирган.
Транспорт воситаси Юнусобод тумани Боғишамол кўчасида тўхтатилган. Текширув давомида автомобилни 2009 йилда туғилган вояга етмаган шахс бошқаргани аниқланган. Машина унинг 1976 йилда туғилган отасига тегишли бўлиб, ўсмир уни отасининг рухсатисиз олиб чиқиб кетгани маълум бўлган.
