Буюк Британия ҳукумати Россиянинг ҳужумлари оқибатида жиддий талафот кўрган Украинанинг энергетика инфратузилмасини қўллаб-қувватлаш учун шошилинч равишда 20 миллион фунт стерлинг (тахминан 25,5 миллион доллар) ажратилишини эълон қилди. Бу ҳақда The Independent хабар берди.
Ушбу қарор Украина президенти Владимир Зеленский ҳаётий муҳим объектларга қилинган тинимсиз ҳужумлар ортидан мамлакатда фавқулодда ҳолат эълон қилганидан сўнг қабул қилинди.
Қаҳратон қиш ва энергетик инқироз
Сўнгги ҳужумлар Киев ва бошқа йирик шаҳарларни зулматга ҳамда минус даражадаги ҳароратга маҳкум этди. Ҳозирда фавқулодда вазиятлар бригадалари иссиқлик ва электр таъминотини тиклаш учун тун-у кун меҳнат қилмоқда. Ажратилган маблағлар қиш ойлари давомида электр тармоқларини таъмирлаш, қайта тиклаш ва ҳимоя қилишга йўналтирилади. Мақсад қаҳратон совуқда уйлар, шифохоналар ва мактабларни узлуксиз электр ва иссиқлик билан таъминлашдир.
100 йиллик ҳамкорлик ва таълимга сармоя
Энергетик ёрдамдан ташқари, Лондон “100 йиллик ҳамкорлик” дастури доирасида мактаблар ўртасидаги алоқаларни кенгайтирмоқда. Келгуси уч йил ичида лойиҳага яна 300 та мактаб қўшилади, бу эса Британия ва Украинадаги 54 минг ўқувчининг манфаатларига хизмат қилади.
“Ушбу ҳамкорлик Россия йўқ қилмоқчи бўлган қадриятларни акс эттиради”, деди бош вазир Кир Стармер.
Ташқи ишлар вазири Иветт Купер эса мактаблар ўртасидаги бундай боғлиқлик ёшлар учун янги билимлар эгаллаш имконини беришини қўшимча қилди. Россиянинг кенг кўламли босқини бошлангандан бери Британиянинг Украина энергетика секторига кўрсатган умумий ёрдами 470 миллион фунт стерлингдан ошди. Шунингдек, мудофаа соҳасида замонавий ҳаво ҳужумидан мудофаа ракеталарини етказиб бериш бўйича 1,6 миллиард фунт стерлингли келишув имзоланган.
Минус 20 даражали совуқ остидаги кураш
Украинада минглаб кўп қаватли уйларни таъмирлаш ишлари ўта оғир об-ҳаво шароитида кечмоқда. Мамлакатда сўнгги йиллардаги энг совуқ қиш кузатилмоқда — тунда ҳарорат минус 20 даражагача тушиб кетмоқда.
“Россия зарбалари ва ёмонлашаётган об-ҳаво оқибатлари жуда оғир. Кўплаб масалалар зудлик билан ҳал қилиниши керак”, деб ёзди Зеленский ўзининг Хъдаги саҳифасида.
Айни пайтда, энергетика вазири Денис Шмигал Украинада бирорта ҳам шикастланмаган электр станцияси қолмаганини айтди. Захира эса атиги 20 кунга етади. Энг оғир вазият Киев, Одесса вилояти ва фронтолди ҳудудларида юзага келган. У Европа Иттифоқидан электр импорти кўпайишини эълон қилди ва кўчалардаги рекламани ўчиришга чақирди.
