Қозоғистон президенти Қосим-Жўмарт Тўқаев Дания ва АҚШга ўзаро манфаатли шартларда Гренландияни 120 йилга ижарага олиш шартномасини кўриб чиқишни таклиф қилди. Бу ҳақда у Покистоннинг The News International газетасига берган интервьюсида билдириб ўтган.
Унинг фикрича, бунда орол ҳуқуқий жиҳатдан Даниянинг бир қисми бўлиб қолади.
“Вариант сифатида — АҚШ ва Дания Гренландияни 120 йилга ижарага олиш келишувини кўриб чиқишлари лозим. Ушбу келишувга биноан, Гренландия ҳуқуқий жиҳатдан Даниянинг бир қисми бўлиб қолади, яъни Дания суверенитети бузилмайди, амалий келишувлар эса умумий стратегик манфаатларга хизмат қилиши мумкин”, деган Қозоғистон президенти.
Тўқаев мулоқот ва халқаро ҳуқуқ нормаларига риоя қилиш, шунингдек, ўзаро мақбул келишувга умид билдиришини таъкидлаган.
“Халқаро амалиётда мамлакатлар умумий ўзаро манфаатли мақсадларга эришиш учун маълум ҳудудлар ёки стратегик инфратузилмани узоқ муддатли ижарага олиш бўйича шартномалар тузган кўплаб ўхшаш ҳолатлар мавжуд. Бундай турдаги ҳар қандай қарор қатъий халқаро ҳуқуқ доирасида, шу жумладан, давлат суверенитети ва БМТ Низомида белгиланган тамойилларга ҳурмат кўрсатиш асосида кўриб чиқилиши лозим”,деди Тўқаев.
