Россия Президенти матбуот котиби Дмитрий Песков Украина Президенти Владимир Зеленскийнинг Владимир Путин билан шахсий учрашув ўтказиш таклифи билдирилган очиқ хатига муносабат билдирди. Бу ҳақда “Интерфакс” хабар берди.
Унинг айтишича, Зеленский исталган вақтда Москвага келиши мумкин.
“Зеленский исталган пайт Москвага келиши мумкин. Президент Путин айтганидек, агар Зеленский гаплашмоқчи бўлса, Москвага келиб, буни амалга ошириши мумкин”, деган Песков.
Шунингдек, у Путин ҳозирча мазкур хат билан танишиб чиқмаганини маълум қилган. Песковнинг сўзларига кўра, Кремлда мурожаат ўқилган, аммо хат эълон қилинган вақтда Путин бошқа тадбирда иштирок этаётгани сабабли уни кўришга улгурмаган.
“Ҳа, биз хатни кўрдик. У (Зеленский) уни Президент иштирок этаётган тадбир вақтида эълон қилди. Президент ҳозирча у билан танишиш имконига эга бўлмади. Мен эса ўқиб чиқдим. Бу ҳақда Путинга маълумот берилади”, деган Песков.
Аввалроқ, Зеленский очиқ хатида фронтнинг бутун чизиғи бўйлаб ўт очишни тўхтатиш, шунингдек, Путин билан нейтрал ҳудудда шахсий учрашув ўтказишни таклиф қилган эди.
Украина раҳбари мактубида Москвада ҳам, Киевда ҳам учрашув ўтказишни мақбул деб ҳисобламаслигини билдирган.
“Украина раҳбарига сизнинг пойтахтингизда, Россия раҳбарига эса Киевда қилар иш йўқ”, деб ёзган Зеленский.
Бундан ташқари, у ҳарбий асирларни “ҳаммани ҳаммага” тамойили асосида алмашиш, олиб кетилган фуқаролар ва болаларни қайтариш ташаббусини илгари сурган.
Зеленский, шунингдек, Россия жамияти урушдан чарчаганини таъкидлаб, мамлакатда бензин тақчиллиги ва нархлар ўсиши каби иқтисодий муаммолар мавжудлигини қайд этган.
