Фарғонада қиймати 2 млрд сўмдан ортиқ олтин қуймаларни ноқонуний Қирғизистонга яширинча олиб ўтмоқчи бўлган шахс қўлга тушди. Бу ҳақда Давлат хавфсизлик хизмати хабар берди.
ДХХнинг Фарғона вилояти бўйича бошқармаси ва Божхона идоралари ходимлари ҳамкорлигида тезкор тадбир ўтказилиб, Фарғона туманида яшовчи, 1996 йилда туғилган шахс бошқарувидаги Damas Қирғизистонга чиқиш мақсадида водил-авто чегара божхона постига кириб келган вақтида текширувдан ўтказилганда автомашина кузов қисмининг ичига яширилган 4 дона ностандарт шаклдаги олтин қуймалар борлиги аниқланиб, ашёвий далил сифатида расмийлаштириб олинган.
Экспертиза хулосасига кўра, уларнинг соф оғирлиги 1 килограмм 232 грамм бўлиб, умумий баҳоси 2 миллиард 182 миллион 466 минг сўмни ташкил этади.
Ҳолат юзасидан ДХХ Фарғона вилояти бўйича бошқармаси Тергов бўлими томонидан мазкур шахсга нисбатан Жиноят кодексининг 182-моддаси (божхона тўғрисидаги қонунчиликни бузиш) 2-қисми “а” банди билан жиноят иши қўзғатилиб, тергов ҳаракатлари олиб борилмоқда.
Ушбу модда билан айбдор деб топилган шахс базавий ҳисоблаш миқдорининг 300 бараваридан 600 бараваригача (123,6 млн сўмдан 242,6 млн сўмгача) миқдорда жарима ёки уч йилгача ахлоқ тузатиш ишлари ёхуд беш йилдан саккиз йилгача озодликдан маҳрум қилиш билан жазоланиши мумкин.
