АҚШ президенти Дональд Трампнинг бойлиги сентябрь ойидан буён 1,1 миллиард долларга камайди. Бунга унинг оиласига тегишли Trump Media and Technology Group (ТМТG) — ижтимоий тармоқ ва криптовалюта компанияси акциялари тарихий энг паст даражага тушиб кетгани сабаб бўлди. Бу ҳақда Forbes хабар берди.
Ҳозирда Трампнинг умумий бойлиги 6,2 миллиард долларни ташкил этмоқда. Бу кўрсаткич сентябрь ойида қайд этилган 7,3 миллиард долларлик рекорддан анча паст. Пасайиш DJТ белгиси остида савдо қилинадиган ТМТG акциялари 10,18 долларгача тушгани фонида юз берди. Бу ҳолат биткоин ва бошқа токенлар нархининг кескин пасайиши билан изоҳланмоқда.
Сентябрь ойида эса Трампнинг бойлиги 3 миллиард долларга ошиб, у Forbes рейтингида АҚШнинг энг бой инсонлари орасида 201-ўринга кўтарилган ва 2024-йилги рўйхатга нисбатан 118 поғонага юқорилаган эди. Ҳозирда у дунё миллиардерлари орасида 595-ўринда турибди.
Капитал ўсишида Трамп оиласининг крипто инвестициялари муҳим рол ўйнаган. Жумладан, 2024-йили эълон қилинган World Liberty Financial лойиҳасига крипто тадбиркор Жастин Сан 75 миллион доллар сармоя киритган.
Трамп ва унинг уч нафар ўғли 2024 йил сентябрида ишга туширилган World Liberty Financial марказлашмаган молия платформасининг ҳаммуассислари сифатида кўрсатилган. Компания 100 миллиард дона $WLFI токен чиқарган бўлиб, шундан 22,5 миллиард токеннинг 70 фоизи Трампга тегишли DT Маркс DEFI LLC компаниясига берилган.
$WLFI токени савдога чиққан илк куни 0,31 долларгача кўтарилган бўлса, ҳозирда унинг нархи 0,158 долларгача пасайган. Бироқ компания сиёсатига кўра, асосчиларга тегишли токенлар дастлаб сотувга чиқарилмайди. Шу боис ҳозирча Трамп бу токенлардан реал фойда олаётгани эҳтимоли паст.
Шунингдек, Trump Media and Technology Group учинчи чоракда 973 минг доллар даромад олган бўлса-да, 54,8 миллион доллар зарар кўрган. АҚШ Қимматли қоғозлар ва биржалар комиссияси маълумотларига кўра, компаниянинг биткоин захиралари 48 миллион долларга камайган, бироқ Cronos криптовалютасидан олинган 33 миллион долларлик фойда йўқотишларни қисман қоплаган.
