FIFA ташкилоти ичида АҚШ президенти Дональд Трампга 2026-йилги Жаҳон чемпионати қуръаси маросими чоғида “Тинчлик мукофоти” топширилгани бир хил муносабат билан қабул қилинмаган.
The Guardian нашри FIFA тизимидаги манбасига таяниб хабар беришича, ташкилотнинг ўрта ва юқори бўғинидаги айрим амалдорлар ушбу қарордан норози бўлган. Хусусан, мукофот эгаси қайси мезонлар асосида танлангани юзасидан очиқ изоҳ берилмагани кўпчиликда саволлар уйғотган. Трампга мукофот топширилиш пайтида FIFA президенти Жанни Инфантино АҚШ етакчисига мурожаат қилиб, “биз умид, бирлик ва келажакни кўришни истаймиз, булар ҳақиқий етакчидан кутиладиган фазилатлар ва сиз FIFA Тинчлик мукофотига лойиқсиз”, деган эди.
Маросимдан кейин АҚШ томонидан қабул қилинган айрим ташқи сиёсий қарорлар эса FIFA ичидаги норозиликни янада кучайтирган. Жумладан, АҚШ Венесуэла ҳудудида бир қатор ҳаво зарбаларини амалга оширди ҳамда мамлакат президенти Николас Мадуро ва унинг рафиқаси Силия Флоресни қўлга олиб, АҚШга олиб кетди. Мадуро 5 январь куни суд олдида гиёҳванд моддалар савдоси, қурол-яроғ ва “наркотерроризм” айбловлари бўйича ўзини айбсиз деб эълон қилди. Шунингдек, Трамп Гренландияни босиб олиш эҳтимоли ҳақида ҳам баёнот бериб, АҚШга бу ҳудуд “жуда зарур” эканини таъкидлаган. Бу эса кескинликни янада оширган
Шу билан бирга, FIFA Трампга мукофот бериш қарорини ҳимоя қилмоқда. Ташкилот вакили миш-мишларга изоҳ берилмаслигини билдирар экан, FIFA ҳар йили тинчлик ва бирлик йўлидаги алоҳида хизматларни эътироф этиш мақсадида ушбу мукофотни топширишини таъкидлади.
Маълумот ўрнида, 2026-йилги Жаҳон чемпионатида 48 та терма жамоа иштирок этади. Мусобақа 11 июндан 19 июлгача АҚШ, Канада ва Мексика майдонларида бўлиб ўтади.
