АҚШ “агар зарурат туғилса” Эронга қуруқликдаги қўшинларини юбориши мумкин. Бу ҳақда президент Дональд Трамп The New York Post газетасига берган интервьюсида маълум қилди.
Менда қўшин юбориш бўйича хавотир йўқ. Одатда президентлар: “Қуруқликдаги қўшинлар бўлмайди” дейишади. Мен бундай демайман. Мен: “Эҳтимол, улар керак бўлмас”, ёки “агар зарур бўлса (юборамиз)”, дейман, деди Оқ уй раҳбари.
АҚШ президенти Эрондаги уруш қанча давом этиши ҳақидаги прогнозларини ўзгартирди. Аввалроқ у можаро тўрт ҳафта давом этиши мумкинлигини айтганди. Аммо NYP билан суҳбатда муддат қисқартирилиши мумкинлигига ишора қилди.
“Ҳаммаси жуда тез содир бўлади. Биз жадвалдан анча илгарилаб кетмоқдамиз: 49 киши ўлдирилган (Эроннинг юқори мартабали раҳбарлари назарда тутилмоқда). Бунинг учун камида тўрт ҳафта керак бўлади, деб ўйлагандик, аммо биз буни бир кунда амалга оширдик”, деган Трамп.
Шу билан бирга, у Эрондаги урушнинг ҳар қандай эҳтимолий давомийлигини “нормал” деб атади. Трамп армия “қанча керак бўлса, шунча” жанговар ҳаракатларни давом эттиришга тайёрлигини айтди.
“Дастлаб биз тўрт-беш ҳафта деб тахмин қилган эдик, бироқ бизда анча узоқроқ муддат учун имкониятлар бор”, деб айтган у.
АҚШ президенти, шунингдек, урушнинг тўртта мақсадини санаб ўтди:
- Эроннинг ракета салоҳиятини заифлаштириш,
- мамлакат ҳарбий-денгиз флотини йўқ қилиш,
- Теҳроннинг ядро қуролига эга бўлолмаслигини таъминлаш,
- унинг прокси кучларини (“Ҳизбуллоҳ”, ҲАМАС ва ҳусийлар назарда тутилмоқда) тийиб туриш.
Охирги вазифани АҚШ ҳукумати Эрон томонидан хориждаги “террорчи армияларни” қуроллантириш, молиялаштириш ва бошқаришни имконсиз қилиш орқали амалга оширилиши айтилди.
Трамп: “Эронга зарбаларнинг катта тўлқини ҳали олдинда”
АҚШ президенти 2 март куни CNN телеканали билан ҳам суҳбатлашди. У қисқа суҳбатда мамлакат армияси Эронга “ҳалокатли зарба” бераётганини айтди. Шунга қарамай, қўшинларнинг Эронга кучли ҳужумлари ҳали бошланмаганини таъкидлади.
“Катта тўлқин ҳали бошланмади, у тез орада келади”, деди Америка етакчиси.
