Сирдарё ва Сурхондарё вилоятларида қўшни мамлакатдан олиб келинган жами 77 килограмм наркотик модда мусодара қилинди. Бу ҳақда Давлат хавфсизлик хизмати хабар берди.
Маълум қилинишича, ДХХнинг Чегара қўшинлари ва Сирдарё вилояти бўйича бошқармаси ҳамда божхона органлари ходимлари ҳамкорлигида ўтказилган тезкор тадбирда Тожикистондан контрабанда қилинган катта миқдордаги наркотик моддалар тўхтатиб қолинди.
Хусусан, ўзбек-тожик давлат чегарасининг Ховос тумани “Шарқобод” маҳалласи ҳудудидан ўтувчи қисмида тожикистонлик наркокурерлар томонидан чегара сим тўсиқлари устидан улоқтирилган 6 дона сумкани қабул қилиб олган вақтларида 1983 ва 1990-йилларда туғилган икки нафар маҳаллий фуқаро чегара наряди томонидан ушланган. Ушбу сумкалар холислар иштирокида кўздан кечирилганда, уларнинг ичида 8 кило 314 грамм героин ва 54 кило 458 грамм опий моддалари борлиги аниқланган.
Мазкур шахсларга нисбатан Жиноят кодексининг 246-моддаси (контрабанда) 2-қисми ва 25,273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, қамоқ эҳтиёт чораси қўлланилди.
Сурхондарё вилоятида кузатилган ҳолатда эса Давлат хавфсизлик хизмати ҳамда Божхона ва ички ишлар органлари ходимлари томонидан Сариосиё туманида ўтказилган тезкор тадбирда мазкур тумандаги умумий ўрта таълим мактабларидан бирида ўқитувчи бўлиб ишловчи, 1984-йилда туғилган фуқаро муқаддам тожикистонлик наркокурерлар келтириб берган 14 кило 680 грамм опий моддасини шартли харидорга 180 минг долларга сотган вақтида ашёвий далиллар билан қўлга олинган.
Ҳолат юзасидан унга нисбатан Жиноят кодексининг 273-моддаси 5-қисми билан жиноят иши қўзғатилиб, қамоқ эҳтиёт чораси қўлланилди. Ҳозирда наркосавдогарнинг жиноий шерикларини аниқлаш бўйича зарур чора-тадбирлар кўрилмоқда.
