Самарқанд вилоятида хориждан олиб келинган 38 кг наркотик моддалар мусодара қилинди. Бу ҳақда Давлат хавфсизлик хизмати хабар берди.
Қайд этилишича, гиёҳвандлик воситаларининг ноқонуний айланмасига қарши курашиш йўналишида Давлат хавфсизлик хизматининг Чегара қўшинлари ва Самарқанд вилояти бўйича бошқармаси ходимлари ҳамкорлигида ўтказилган тезкор тадбирда қўшни давлатдан контрабанда қилинган катта миқдордаги наркотик моддалар тўхтатиб қолинган.
Хусусан, олдиндан кузатувга олинган Ургут туманида яшовчи, 1989 ва 1992 йилларда туғилган 3 нафар фуқаро айланма йўллар орқали Тожикистон Республикасининг Панжикент туманига бориб, наркосавдогарлардан соф оғирлиги 14 кг 766 гр “опий” ва 14 кг 958 гр “гашиш” моддаларини олиб, ўзбек-тожик давлат чегарасини бузган ҳолда, Ўзбекистон ҳудудига қайтиб ўтган вақтида ашёвий далиллар билан ушланган.
Ҳозирда қонунбузарларга нисбатан Жиноят кодексининг 246-моддаси (Контрабанда) 2-қисми ва 273-моддаси (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, “қамоқ” эҳтиёт чораси қўлланилган.
Бошқа ҳолатда эса Давлат хавфсизлик хизмати ва Ички ишлар органлари ходимлари ҳамкорлигида олиб борилган тезкор-қидирув тадбирлари давомида Самарқанд шаҳар “Орзу” МФЙ ҳудудида жойлашган хусусий автомашина гаражи холислар иштирокида кўздан кечирилган. Натижада ундаги махсус тайёрланган хуфия жойда бўлган мармар тошлар орасига 9 кг 40 гр “опий” экстракцияси яширилганлиги аниқланган.
Ҳозирда мазкур ҳолат юзасидан Жиноят Кодексининг 246-моддаси (Контрабанда) 2-қисми ва 273-моддаси (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, гараж эгасини қўлга олиш чоралари кўрилмоқда.
Қайд этиш жоиз, ҳар икки ҳолатдаги жиноятларни содир этганлик учун қонунчиликда 20 йилгача озодликдан маҳрум қилиш жазоси белгиланган.
